नाशिक (इंडिया दर्पण वृत्तसेवा)– यशवंतराव चव्हाण महाराष्ट्र मुक्त विद्यापीठ आणि बीव्हीजी इंडिया लिमिटेड यांच्यात नुकताच एक ऐतिहासिक सामंजस्य करार (MoU) करण्यात आला आहे. त्यानुसार या दोन्ही संस्था संयुक्तरित्या नवी मुंबई येथील जेएनपीए शेवा परिसरात ड्रायव्हिंग आणि लॉजिस्टिकचे देशातील सर्वात अत्याधुनिक प्रशिक्षण आणि कौशल्य विकास केंद्र स्थापन करणार आहेत. विद्यापीठात उभय पक्षाच्या वतीने या करारावर स्वाक्षरी करण्यात आली.
यावेळी विद्यापीठाचे मा. कुलगुरू प्रा. संजीव सोनवणे, बीव्हीजी इंडिया लिमिटेडच्या लर्निंग अँड डेव्हलपमेंटचे सहाय्यक उपाध्यक्ष श्री. सुरज महाजन, विद्यापीठाचे कुलसचिव श्री. दिलीप भरड, व्यवसाय शिक्षण व कौशल्य विकास विद्याशाखेचे संचालक डॉ. जयदीप निकम, बीव्हीजीचे उत्तर महाराष्ट्र विभागप्रमुख श्री. बाळासाहेब कांकळे, वरिष्ठ व्यवस्थापक प्रशिक्षण श्री. सुदर्शन भालेराव, व्यवस्थापक प्रशिक्षण श्री. संग्राम इंगवले, सहायक व्यवस्थापक प्रशिक्षण श्री. कल्पेश बोरसे, विद्यापीठ वरिष्ट शैक्षणिक संयोजक डॉ. माधुरी खर्जुल, श्री. मनोहर पवार, श्रीमती. सुजाता मोरे यांची प्रमुख उपस्थिती होती.
या करारानुसार अत्याधुनिक प्रशिक्षण आणि कौशल्य विकास केंद्र निर्मितीचा हा उपक्रम ड्रायव्हिंग व लॉजिस्टिक क्षेत्रात जागतिक दर्जाची कौशल्ये, आंतरराष्ट्रीय प्रमाणीकरण आणि मोफत प्रशिक्षण यांची त्रिसूत्री पूर्ण करणारा ठरणार आहे. जेएनपीए मधील बिझनेस फॅसिलिटेशन सेंटरमध्ये या प्रकल्पाचा पहिला प्रशिक्षण वर्ग राबवला जाणार आहे. त्यानंतर जेएनपीएच्याच नवीन परिसरात पूर्णवेळ प्रशिक्षण सुविधा विकसित केल्या जातील. त्यात जागतिक स्तराच्या सुविधा उपलब्ध असतील. प्रामुख्याने थिअरीसाठी अद्ययावत क्लासरूम, सिम्युलेटर लॅब, ऑटो इंजिनिअरिंगसाठी प्रयोगशाळा, ड्रायव्हिंग रेंज, कंट्रोल रूम आणि मेस व निवासाची व्यवस्था असेल. प्रशिक्षणार्थींना आंतरराष्ट्रीय मान्यता प्राप्त प्रक्रियांचे ज्ञान दिले जाईल. तसेच, आरटीओ आणि इतर संस्थांशी समन्वय साधून परवाना नूतनीकरण आणि प्रगत सर्टिफिकेशनची सुविधा मिळेल.
जड व हलक्या वाहन चालकांसाठी आंतरराष्ट्रीय सर्टिफाइड प्रशिक्षण, चालक आणि सहाय्यक कर्मचाऱ्यांच्या कौशल्यवाढीचा अभ्यासक्रम, रस्ता सुरक्षा आणि व्यवस्थापन प्रशिक्षण, पोर्ट लॉजिस्टिक, वेअरहाउसिंग, आणि मल्टी-मॉडल ट्रान्सपोर्टचे प्रशिक्षण, आंतरराष्ट्रीय नोकरीसाठी सक्षम व्यवस्था तयार करणे आणि मोठ्या प्रमाणात रोजगार निर्माण करणे हे या कराराचे प्रमुख उद्दिष्ट्य आहे.
लॉजिस्टिक प्रशिक्षण क्षेत्रात क्रांती
करारानुसार हा प्रकल्प भारतातील ड्रायव्हिंग आणि लॉजिस्टिक प्रशिक्षण क्षेत्रात क्रांती घडवणारा ठरेल. शिक्षण – प्रशिक्षण आणि रोजगार याचे जिवंत उदाहरण या कराराद्वारे आपणास बघावयास मिळणार आहे.
कुलगुरू डॉ. संजीव सोनवणे
चमूसाठी हा अभिमानाचा क्षण
बीव्हीजीच्या लर्निंग अँड डेव्हलपमेंट चमूसाठी हा अभिमानाचा क्षण आहे. आम्ही फक्त प्रशिक्षण देत नाही, तर भविष्यातील जागतिक ड्रायव्हिंग लीडर्स घडवत आहोत.
सुरज महाजन, सहाय्यक उपाध्यक्ष बीव्हीजी इंडिया लिमिटेड, लर्निंग अँड डेव्हलपमेंट.
