नागपूर ( इंडिया दर्पण वृत्तसेवा) – दूर्गम भागातील आदिवासींच्या आरोग्य विषयक समस्या सोडविण्यासाठी MUHS FIST-25 परिषद महत्वपूर्ण असल्याचे राज्याच्या मुख्य सचिव श्रीमती सुजाता सौनिक यांनी केले. महाराष्ट्र आरोग्य विज्ञान विद्यापीठ व आखिल भारतीय आयुर्विज्ञान संस्थान, नागपूर यांच्या संयुक्त विद्यमाने ’एम्स’ नागपूर येथे आयोजित परिषदेत त्यांनी केले. यावेळी विद्यापीठाच्या मा. कुलगुरु लेफ्टनन्ट जनरल माधुरी कानिटकर (निवृत्त) समवेत ’एम्स’ नागपूरचे संचालक डॉ. प्रशांत जोशी, मा. प्रति-कुलगुरु डॉ. मिलिंद निकुंभ, MUHS FIST-25 चे संयोजक डॉ. संजीव चौधरी, विद्यापीठाचे कुलसचिव डॉ. राजेंद्र बंगाळ उपस्थित होते.
यावेळी मा. मुख्य सचिव श्रीमती सुजाता सौनिक यांनी सांगितले की, आदिवासी भागात आरोग्य समस्या वेगळया पध्दतीच्या आहेत. यासाठी संशोधनाव्दारेच त्याच्या मुळापर्यंत पोहचणे शक्य होणार आहे. आरोग्य क्षेत्रात अधिक सुधारणा हवी असल्यास संवाद व कृतीच्या माध्यमातून त्या सोडविणे शक्य आहे. विद्यापीठाचा MUHS FIST-25 परिषद महत्वपूर्ण असून आदिवासी विभागातील आरोग्य विषयक समस्या जाणून त्यावर उपाययोजना शोधण्यासाठी भूमिका महत्वपूर्ण ठरेल. शासनाकडून राबविण्यात येणाऱ्या विविध कल्याणकारी योजनांमध्ये आशा वर्कर, आरोग्य सेवक यांच्या कडून आरोग्य विषयक माहिती प्राप्त होते ती पुरेशी नसून ’वर्ल्ड हेल्थ ऑरगनायझेश’च्या मानकांनुसार परिपूर्ण असणे गरजेचे आहे. विद्यापीठाच्या ’ब्लॉसम’ प्रकल्पाअंतर्गत प्रत्यक्ष आरोग्य सेवेविषयी काम करुन मिळालेली माहिती उपाययोजनांसाठी आवश्यक असल्याचे त्यांनी सांगितले.
त्या पुढे म्हणाल्या की, आदिवासी भागात सिकलसेल अॅनिमिअया, कुपोषण रोगांचे प्रमाण जास्त आहे. त्यासाठी केंद्रशासन व राज्यशासनाकडून विविध उपक्रम सुरु असून त्याला मोठया प्रमाणात यश मिळत असल्याचे त्यांनी सांगितले.
