मुंबई (इंडिया दर्पण वृत्तसेवा) – परिवहन आणि अर्थ खात्यातील वादाचा फटका एसटी कर्मचाऱ्यांना बसला आहे. दोन विभागातील विसंवादामुळे कर्मचाऱ्यांचा पगार रखडल्याची बाब पुढे आली आहे. त्यामुळे एसटी कर्मचाऱ्यांमध्ये तीव्र नाराजी आणि संतापाचे वातावरण आहे. सरकार कोणतेही आले तरी एसटी कर्मचाऱ्यांची प्रचंड परवड होत असल्याचे दिसून येत आहे.
एसटी महामंडळाकडून पगारासाठी अर्थ विभागाकडे थकीत असलेल्या एक हजार कोटी रुपयांची मागणी केली आहे. दर महिन्याला कर्मचाऱ्यांना पगारासाठी ३६० कोटी रुपये मिळाले हवेत. मात्र प्रत्यक्षात तेवढी रक्कम दरमहा मिळत नसल्यानं महामंडळाकडून अर्थ विभागाला एक पत्र लिहित थकीत रक्कम मागितली होती. मात्र, अर्थ विभागाकडून एसटी महामंडळाला आधी दिलेल्या रकमेचा हिशोब देण्यास सांगितले आहे. यासंदर्भात १६ फेब्रुवारी रोजी अर्थ, परिवहन आणि एसटी महामंडळाच्या अधिकाऱ्यांमध्ये बैठक पार पडणार आहे. एसटी आंदोलनावेळी दर महिन्याला ७ ते १० तारखेमध्ये पगार करण्याचे आश्वासन सरकारनं कोर्टात दिले होते. मात्र दर महिन्यात पगाराला उशीर होत असल्यानं कर्मचाऱ्यांमध्ये नाराजी बघायला मिळत आहे. अशात आता पगाराचे भविष्यच विवरणावर अवलंबून असल्यानं कर्मचारी पुन्हा आक्रमक होण्याची शक्यता आहे.
न्यायालायात प्रश्न जाऊनही
एसटी महामंडळ आर्थिक अडचणीत असल्यामुळे कर्मचाऱ्यांच्या वेतनासाठी चार वर्षे सरकारच्या बजेटमध्ये तरतुद केली जाईल आणि महिन्याला लागणारी पूर्ण रक्कम देण्याचे तसेच प्रत्येक महिन्याच्या ७ ते १० तारखे दरम्यान वेतन देण्याचे सरकारच्या वतीने न्यायालयात संप काळात मान्य केले होते. जानेवारी महिन्यात १९ तारखेला एसटी महामंडळाने मागील सहा महिन्यांच्या वेतन रकमेतील थकीत रकमेसह या महिन्याच्या वेतनासाठी १०१८.५० कोटी रुपयांची मागणी लेखी पत्राद्वारे राज्य सरकारच्या अर्थ खात्याकडे केली होती पण त्याला आता एक महिना होत आला तरीही सरकारकडून निधी न मिळाल्याने कर्मचाऱ्यांना वेतन मिळालेले नाही. यासाठी परिवहन आणि अर्थ खात्यातील बेबनाव कारणीभूत असल्याची टीका महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केली आहे.
MSRTC Employee January Salary Pending
