मुंबई (इंडिया दर्पण वृत्तसेवा) – खासदार सुप्रिया सुळे यांची सोशल मीडियावरील पोस्ट आज चांगलीच चर्चेत आहे. आपल्या मुलीचे कौतुक करणारी पोस्ट त्यांनी आज टाकली. तुझे आई – वडील असल्याचा आम्हाला अभिमान वाटत असल्याचे त्यांनी म्हटले आहे. खासदार सुप्रिया सुळे यांची कन्या रेवती हिने लंडन स्कूल ऑफ इकॉनॉमिक्समधून अर्थशास्त्रात पदवी घेतली आहे. हा आमच्यासाठी अभिमानाचा विषय असल्याचे खासदार सुप्रिया सुळे यांनी आपल्या पोस्टमध्ये म्हटले आहे.
राष्ट्रवादी काँग्रेसचे राष्ट्रीय अध्यक्ष शरद पवार यांची नात आणि खासदार सुप्रिया सुळे यांची कन्या रेवती हिनं अर्थशास्त्रात चांगलेच यश संपादन केले आहे. रेवतीने लंडन स्कूल ऑफ इकनॉमिक्समधून अर्थशास्त्रातील पदवीचं शिक्षण पूर्ण केलं. त्याचा निकाल आज जाहीर झाला. निकाल जाहीर झाल्यानंतर खासदार सुप्रिया सुळे यांनी ट्विटरवर एक भावनिक पोस्ट केली.
पोस्टमध्ये काय?
आमची कन्या रेवती हिने लंडन स्कूल ऑफ इकनॉमिक्समधून मास्टर्स डिग्री मिळवली आहे. आजच तिचा निकाल आला असून तिचे पालक म्हणून आम्हाला तिचा अभिमान वाटतो. मात्र, तिचा हा ग्रॅज्युएशनचा प्रवास आम्हाला अनुभवता आला नाही याचे दु:ख वाटतेय, पण हेच आयुष्य आहे.
डॉ. बाबासाहेब आंबेडकरांनी येथूनच मिळवली डॉक्टरेट
लंडन स्कूल ऑफ इकॉनॉमिक्स ही जगप्रसिद्ध शैक्षणिक संस्था आहे. या संस्थेतून जगभरातील अनेक मोठ्या व्यक्तींनी शिक्षण घेतलं आहे. आपल्यासाठी ही शैक्षणिक संस्था महत्त्वाची आहे, कारण भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांनीही याच संस्थेमधून अर्थशास्त्रातली आपली पीएचडी केली आहे.
