नवी दिल्ली (इंडिया दर्पण वृत्तसेवा) – केंद्रातील मोदी सरकारने २०२४ च्या लोकसभा निवडणुकीची तयारी सुरू केली आहे. त्यामुळेच रोजगार शोधणाऱ्या तरुणांसाठी मोदी सरकारने मोठी घोषणा केली आहे. पुढील दीड वर्षात केंद्र सरकार तब्बल १० लाख नोकऱ्या उपलब्ध करुन देणार आहे.
रोजगाराच्या मुद्द्यावर अनेकदा प्रश्नांना सामोरे जाणारे मोदी सरकार बहुधा आता या संकटावर मात करण्यासाठी योजना तयार करत आहे. पीएमओने दिलेल्या माहितीनुसार, येत्या दीड वर्षात केंद्र सरकारच्या सर्व विभागांमध्ये 10 लाख पदांची भरती केली जाणार आहे. पीएमओ इंडिया अकाऊंटवरून यासंदर्भात माहिती देताना ट्विट करण्यात आले आहे की, ‘पंतप्रधान नरेंद्र मोदी यांनी सर्व मंत्रालये आणि विभागांमधील मानव संसाधनांचा आढावा घेतला आहे. यासोबतच येत्या दीड वर्षात मिशन मोडवर काम करून 10 लाख लोकांची भरती करावी, असे आदेशही त्यांनी सरकारला दिले आहेत.
पाटणा, अलाहाबाद सारख्या शहरांमध्ये तरुणांनी रेल्वे भरतीसाठी निदर्शने केली आहेत. मोदी सरकारवर हल्लाबोल करत अनेकदा ते रोजगार देऊ शकले नसल्याचा आरोप केला आहे. विशेषत: नोटाबंदी, जीएसटी आणि नंतर कोरोना या काळात अर्थव्यवस्थेचा विकास दर मंदावल्यामुळे खासगी क्षेत्रातील नोकऱ्यांच्या संधी फारशा बाहेर येत नाहीत. अशा परिस्थितीत मोदी सरकारची ही घोषणा सरकारी नोकरीच्या शोधात असलेल्या तरुणांसाठी मोठी बातमी आहे.
गेल्या वर्षी केंद्रीय मंत्री जितेंद्र सिंह यांनी राज्यसभेत एका प्रश्नाला उत्तर देताना सांगितले होते की 1 मार्च 2020 पर्यंत केंद्र सरकारच्या विभागांमध्ये 8.72 लाख पदे रिक्त आहेत. अशा परिस्थितीत, हे स्पष्ट आहे की सध्या हा आकडा 10 लाखांच्या जवळ गेला असेल, ज्यांच्यावर पंतप्रधान नरेंद्र मोदींनी भरतीचे आदेश दिले आहेत. जितेंद्र सिंह यांनी सांगितले होते की, केंद्र सरकारच्या सर्व विभागांमध्ये एकूण 40 लाख 4 हजार पदे आहेत, त्यापैकी सुमारे 31 लाख 32 हजार कर्मचारी नियुक्त आहेत. अशा प्रकारे 8.72 लाख पदांची भरती करण्याची गरज आहे. इतकेच नाही तर २०१६-१७ ते २०२०-२१ या कालावधीतील भरतीची आकडेवारी देताना जितेंद्र सिंह यांनी एसएससीमध्ये एकूण २,१४,६०१ कर्मचाऱ्यांची भरती झाल्याचे सांगितले होते. याशिवाय RRB ने 2,04,945 लोकांना नियुक्ती दिली आहे. तर UPSC ने देखील 25,267 उमेदवारांची निवड केली आहे.
https://twitter.com/PMOIndia/status/1536558426352123904?s=20&t=6C13hApCS149I2V8eBa5Gw
