विधान परिषद निवडणुकीत मोठा ट्विस्ट; अखेरच्या क्षणी या दिग्गज उमेदवाराची माघार

मुंबई (इंडिया दर्पण वृत्तसेवा) – विधान परिषदेच्या निवडणुकीत आज अखेरच्या क्षणी ट्विस्ट पहायला मिळाला. कारण, भाजप पुरस्कृत अपक्ष अर्ज दाखल केलेल्या सदाभाऊ खोत यांनी निवडणूक रिंगणातून माघार घेतली आहे. त्यांनी त्यांचा उमेदवारी अर्ज आज मागे घेतला. त्यामुळे आता १० जागांसाठी ११ उमेदवार रिंगणात आहेत. त्यात भाजपचे ५, शिवसेनेचे २, राष्ट्रवादी काँग्रेसचे २ आणि काँग्रेसच्या २ उमेदवारांचा समावेश आहे.

महाराष्ट्रातून विधानपरिषदेवर रिक्त होत असलेल्या 10 जागांसाठी 20 जून रोजी निवडणूक होत आहे. महाराष्ट्रसह उत्तर प्रदेश आणि बिहार विधान परिषदेतून 06.07.2022 ते 21.07.2022 या कालावधी दरम्यान निवृत्त होणाऱ्या सदस्यांच्या जागा भरण्यासाठी विधानपरिषदांच्या व्दैवार्षिक निवडणूक कार्यक्रम, निवडणूक आयोगाकडून जाहीर करण्यात आला आहे. महाराष्ट्रातील विधानपरिषदेचे 10 सदस्य तसेच उत्तर प्रदेश, आणि बिहार विधानपरिषदांच्या एकूण 20 सदस्यांचा कार्यकाळ संपुष्‍टात येत आहे. या रिक्त होणा-या जागांसाठी येणा-या‍ 10 जून रोजी निवडणूक होणार आहे.

महाराष्ट्रातून सदाशिव खोत, सुजितसिंग ठाकूर, प्रवीण दरेकर, सुभाष देसाई, रामराजे प्रतापसिंह नाईक-निंबाळकर, संजय दौंड, विनायक मेटे, प्रसाद लाड, दिवाकर रावते या विधान परिषद सदस्यांचा कार्यकाळ येत्या 7 जुलै रोजी संपुष्टात येणार आहे तर, रामनिवास सिंह यांचा कार्यकाळ 2 जानेवारी 2022 रोजी संपुष्टात आलेला आहे. सदरील जागांसाठी विधानसभेच्या सदस्यांकडून विधानपरिषदेवर निवड केली जाणार आहे.

निवडणूक कार्यक्रम असा
विधानपरिषदेच्या या निवडणुकीसाठी आयोगाकडून अधिसूचना जाहीर झाली आहे. अर्ज माघारीचा आजचा शेवटता दिवस होता. मतदान 20 जून 2022 रोजी सकाळी 9.00 ते सायंकाळी 4.00 वाजेपर्यंत होणाार असून, त्याचदिवशी सायंकाळी 5.00 वाजता मतमोजणी होऊन निकाल जाहीर होणार आहे.

कोरोना नियम
संबंधित राज्यांच्या मुख्‍य सचिवांनी या निवडणुकीचा कार्यक्रम पार पाडण्‍यासाठी संबंधित अधिका-यांना सर्व आवश्‍यक त्या उपाय योजना करण्‍याविषयी निर्देश आयोगाकडून दिले गेलेले आहेत. निवडणुका आयोजित करताना कोविड-19 प्रतिबंधात्मक उपाययोजनांबाबत सध्याच्या सूचनांचे पालन केले जात आहे किंवा कसे़ याची खात्री करण्यासाठी संबंधित मुख्य सचिवांना राज्यातील वरिष्ठ अधिकाऱ्यांची नियुक्ती करण्याचे निर्देश देण्यात आले आहेत.

रिंगणातील उमेदवार असे
भाजप – १) प्रवीण दरेकर २) राम शिंदे ३) श्रीकांत भारतीय ४)उमा खापरे ५) प्रसाद लाड
शिवसेना – १) सचिन अहिर २) आमशा पाडवी
राष्ट्रवादी काँग्रेस – १) रामराजे निंबाळकर २) एकनाथ खडसे
काँग्रेस – १) भाई जगताप २) चंद्रकांत हंडोरे