नवी दिल्ली (इंडिया दर्पण वृत्तसेवा) – दिल्लीचे मंत्री सत्येंद्र जैन यांना तिहार तुरुंगात व्हीआयपी ट्रीटमेंट दिल्याप्रकरणी आता कारवाई करण्यात आली आहे. तुरुंग अधीक्षक अजित कुमार यांना तडकाफडकी निलंबित करण्यात आले आहे. दिल्ली सरकारच्या तुरुंग विभागाने म्हटले आहे की, प्रथमदर्शनी असे आढळून आले आहे की अजित कुमार यांनी कर्तव्य बजावण्यात निष्काळजीपणा केला होता. याप्रकरणी पुढील तपासाचे आदेश देण्यात आले आहेत.
अजित कुमार हा जेल क्रमांक ७ चा प्रभारी असल्याचे सांगण्यात येत आहे. सत्येंद्र जैन यांना जेल क्रमांक ७ मध्येच ठेवण्यात आले आहे. अमलबजावणी संचलनालयाने (ईडी) आम आदमी पार्टी सरकारमधील आरोग्य मंत्री सत्येंद्र जैन यांच्याबाबत महत्त्वपूर्ण माहिती न्यायालयाला दिली होती, ज्यांना मनी लाँड्रिंग प्रकरणात अटक करण्यात आली होती. न्यायालयात आपली भूमिका मांडताना ईडीने म्हटले होते की, सत्येंद्र जैन यांना तिहार तुरुंगात अज्ञात व्यक्तीने पायाची मालिश करताना पाहिले होते.
पुरावा म्हणून यासंबंधीचे व्हिडिओही आपल्याकडे असल्याचा दावाही ईडीने केला होता. याशिवाय त्यांना विशेष जेवणही देण्यात आल्याची माहिती ईडीकडून न्यायालयाला देण्यात आली. कॅबिनेट मंत्री सत्येंद्र जैन हे १२ जूनपासून दिल्लीतील तिहार तुरुंगात आहेत. तपास यंत्रणांच्या हवाल्याने असेही सांगण्यात आले की, सत्येंद्र जैन आपल्या पत्नीला तुरुंगात अगदी सहज भेटतात. तो तुरुंगाचे नियम झुगारून पत्नीला भेटतो. ईडीनेही सत्येंद्र जैन यांच्याबाबत न्यायालयासमोर सांगितले होते की, ते तपासात सहकार्य करत नाहीत.
मनी लाँड्रिंगच्या गंभीर आरोपांनी घेरलेल्या सत्येंद्र जैन यांच्या अडचणी संपत नाहीत. महाठग सुकेश चंद्रशेखर याने अलीकडेच सत्येंद्र जैन आणि आम आदमी पार्टीच्या काही नेत्यांवर एकामागून एक पत्र लिहून गंभीर आरोप केले होते. सुकेश चंद्रशेखर याने दावा केला होता की, सत्येंद्र जैन यांनी तिहारमध्ये त्याच्याकडून संरक्षण म्हणून १० कोटी रुपये घेतले. एवढेच नाही तर अरविंद केजरीवाल आणि पक्षाच्या इतर नेत्यांनी आपल्याला राज्यसभेचे तिकीट देण्यास सांगितले होते आणि त्याबदल्यात त्याच्याकडून ५० कोटी रुपयेही घेतले होते, असा दावाही या सुकेशने केला होता.
या संपूर्ण वादात भारतीय जनता पक्ष (भाजप) सातत्याने आम आदमी पक्षावर हल्लाबोल करत आहे. न्यायालयात ईडीच्या युक्तिवादावर आपची खिल्ली उडवत भाजपने म्हटले होते की, तिहारमध्ये केजरीवाल यांनी मसाज सेंटर उघडले आहे. भाजपने तसे पोस्टरही लावले होते.
डीजींची बदली
दिल्लीचे नायब राज्यपाल व्ही के सक्सेना यांना लिहिलेल्या पत्रात ठग याने आपच्या नेत्यांविरोधात बोलल्यानंतर तुरुंगात त्याला आणि त्याच्या पत्नीला छळण्यात आले. सीआरपीएफ जवानाने आपल्याला मारहाण केल्याचा दावा सुकेशने केला होता. सुकेशने त्याला आणि त्याच्या पत्नीला दिल्ली सोडून इतर कारागृहात हलवण्याची विनंती केली होती. सुकेश याने तिहारचे तुरुंग महानिरीक्षक (डीजी) संदीप गोयल यांच्यावर खंडणीचे गंभीर आरोपही केले होते. त्यानंतर डीजी संदीप गोयल यांची बदली करण्यात आली.
Minister Satyendra Jain Tihar Jail VIP Treatment
Superintendent Suspend Delhi AAP BJP
