नाशिक (इंडिया दर्पण वृत्तसेवा) – केंद्रीय रस्ते, वाहतूक आणि महामार्ग मंत्री नितीन गडकरी येत्या १८ डिसेंबर रोजी नाशिक दौऱ्यावर येत आहेत. यावेळी ते विविध विकासकामांचे भूमीपूजन करणार आहेत. गोंदे ते पिंपरी सदो या दरम्यानच्या महामार्गाचे सहा पदरीकरण तसेच मुंबई -आग्रारोडवरील आडगाव शिवारातील दहावा मैल, जवळके फाटा तसेच नाशिक तालुक्यातील आंबेबहूला येथे बोगदा यांचाही समावेश आहे. ८६० कोटी रुपयांच्या विकासकामांचे हे भूमीपूजन नाशिकसाठी अत्यंत महत्त्वाचे आहे. यामुळे नाशिक-मुंबई दरम्यानच्या वाहतुकीची कोंडी टाळणार असून खान्देशातील प्रवाशांना समृद्धी महामार्गाला सहजपणे जॉईन होता येणार आहे. तर, बोगद्यांमुळे अपघात टळण्यास मोठी मदत होणार असल्याचे खासदार हेमंत गोडसे यांनी म्हटले आहे.
गोंदे फाटा ते पिंपरी सदो या दरम्यानच्या रस्त्यावर सतत वाहतुकीची मोठी कोंडी होत असते. पिंपरी सदो पासून समृद्धी महामार्ग हा अगदीच हाकेच्या अंतर्गत आहे. त्यामुळे नाशिक – मुंबई दरम्यानच्या महामार्गाचे सहा पदरीकरण व्हावे यासाठी गेल्या काही महिन्यांपासून खा. हेमंत गोडसे यांचे प्रयत्न सुरू होते. नासिक – मुंबई महामार्गावरील वाहतूक टाळण्यासाठी आणि धुळे , जळगाव, नंदुरबार येथील प्रवाशांना पिंपरी सदो शिवारातील समृद्धी महामार्गावर लवकरात लवकर पोहोचण्यासाठी गोंदे ते पिंपरी सदो या दरम्यानच्या रस्त्याचे सहा पदरीकरण होणे किती गरजेचे आहे हे खा. गोडसे यांनी ना. नितीन गडकरी यांच्या लक्षात आणून दिले होते.
यातूनच मागील महिन्यात ना. गडकरी यांनी गोंदे ते पिंपरी सदो या दरम्यानच्या रस्त्याचे सहा पदरीकरण करण्याचा निर्णय घेतला असून या कामासाठी सातशे कोटी रुपयांचा निधीला मंजुरी दिली आहे. यापूर्वी खासदार गोडसे यांच्या सततच्या पाठपुराव्यातून महामार्गावरील आडगाव शिवारातील दहावा मैल येथे उड्डाणपुल तर जवळके फाटा आणि आंबे बहूला जंक्शन येथे बोगदयाना मंजुरी मिळालेली आहे. गोंदे ते पिंपरी सदो या दरम्यानच्या वीस किलोमीटर रस्त्याच्या सहा पदरीकरणाच्या कामाचा समावेश आहे. तसेच, दहावा मैल येथील उड्डाणपुल आणि जवळके फाटा आणि आंबे बहूला जंक्शन येथील भुयारी मार्ग तथा बोगद्यांच्या कामांचा शुभारंभ अठरा डिसेंबर ना. गडकरी यांच्या हस्ते होणार असल्याची माहिती खा. गोडसे यांनी दिली आहे. पैकी गोंदे ते पिपरी सदो दरम्यानच्या रस्त्याच्या सहा पदरीकरणासाठी सातशे कोटी तर दहावा मैल चौकातील उड्डाणपूलासाठी सुमारे ४५ कोटी, जवळके फाटा येथील बोगद्यासाठी ५५ तर आंबे बहूल्यासाठी ६० कोटी रूपयांचा निधी मंजूर झालेला आहे.
Minister Nitin Gadkari Nashik Tour Development Project
Stone Laying Highway Infrastructure
