जळगाव (इंडिया दर्पण वृत्तसेवा) – पाणीपुरवठा मंत्री गुलाबराव पाटील यांच्या जळगाव जिल्ह्यात तीव्र पाणीटंचाई जाणवत आहे. आधीच प्रचंड उष्णता आणि उकाड्याने हैराण झालेल्या जिल्हावासियांना आता पाण्यासाठी भटकंती करावी लागत आहेत. विशेषतः ५५ गावांमध्ये तीव्र टंचाई जाणवत असून नागरिक आता पाण्यासाठी आंदोलनाच्या तयारीत आहेत. विशेष म्हणजे, राज्याचे पाणीपुरवठा मंत्री गुलाबराव पाटील यांचे गाव असलेल्या पाळधीत १२ दिवसांनी तर लगतच्या धरणगावमध्ये चक्क २२ दिवसांनी पाणी पुरवठा होत आहे. त्यामुळे त्याची राज्यभरात चर्चा होत आहे.
घागरी फोडल्या
गुलाबराव पाटील यांच्या मतदारसंघातील धरणगावातच पाणी प्रश्न चांगलाच पेटला आहे. तसेच जळगाव जिल्ह्यात सध्या तब्बल ५५ गावांमध्ये तीव्र पाणीटंचाई आहे. २३ गावांमध्ये टँकरने पाणी पुरवठा होत असून पाणी पुरवठा मंत्री जळगावचे असूनही मण्यारखेडा गावात मनसेने टँकरच्या साहाय्याने पाणी दिले. तर नशिराबाद गावात नागरिकांनी पाण्यासाठी घागरी फोडल्या.
विशेष म्हणजे मंत्री गुलाबराव पाटील यांच्या पाळधी गावात तब्बल १२ दिवसांनी पाणी येत आहे. तर तिथून अवध्या काही किमीवर असलेल्या धरणगावात तब्बल २२ दिवसांनी पाणी मिळत आहे, एकीकडे गुलाबराव पाटील यांचा उल्लेख त्यांच्या समर्थकांकडून पाणीवाला बाबा असा केला जात असताना. गुलाबराव पाटील हे सुद्धा स्वत:ला पाणीवाला बाबा म्हणतात. तर दुसरीकडे राज्याच्या पाणी पुरवठा मंत्र्यांच्या मतदारसंघातच पिण्याच्या पाण्यासाठी नागरिक वणवण भटकंती करत आहेत.
दररोज पाणी देण्याचे आश्वासन
जळगाव जिल्ह्यातील पाडळसरे धरणाचा प्रश्र प्रलंबित आहे. तर दुसरीकडे पाणी पुरवठा मंत्र्यांच्या गावात आणि तालुक्यात सर्वसामान्य नागरिकांची पिण्याच्या पाण्याची तहान भागत नसल्याचे भीषण चित्र समोर आले आहे.विशेष म्हणजे कित्येक वर्षांपासूनचा हा पाणी प्रश्न प्रलंबित आहे. गुलाबराव पाटील यांच्या मतदारसंघातील काही गावांमध्ये भीषण पाणीटंचाई जाणवत आहे.
‘हर घर जल’, या केंद्राच्या योजनेचे काम महाराष्ट्रात सुरु आहे. मात्र गेल्या विधानसभा निवडणुकीत गावातून मतदान केले नाही म्हणून आमच्या गावाच्या पाणी योजनेवर लाल फितीत ठेवल्याचा आरोप लोणवाडी गावच्या ग्रामस्थांनी केला आहे. गुलाबराव पाटील यांनी ५ जुलैपासून दररोज गावाला पाणी देण्याचे आश्वासन आपल्या वाढदिवसाच्या दिवशी दिले आहे. सध्या पाईपलाईनचे काम युद्ध पातळीवर सुरू आहे. पाईपलाईनची चाचणी देखील पालकमंत्री गुलाबराव पाटील यांनी स्वतः उपस्थित राहून पाळधी गावात केली आहे. पाण्यासाठी मनसे आणि नागरिकांनी गुलाबराव पाटील यांच्या वाढदिवसाच्या दिवशीच हंडा मोर्चा काढला होता.
Minister Gulabrao Patil Village Water Supply
