इंडिया दर्पण ऑनलाइन डेस्क – जाणार जाणार म्हणत अखेर मान्सून परतला. नैऋत्य मोसमी वारे माघारी फिरताच राज्यातील हवामानात झपाट्याने बदल होत आहे. रात्रीच्या किमान तापमानात घट झाली असून, हा गारवा आल्हाददायक आहे. राज्यात थंडीची चाहूल लागली आहे. मध्य महाराष्ट्र, कोकण आणि मराठवाड्यात गारवा वाढत आहे. विदर्भातही रात्री हलका गारवा जाणवत आहे.
राज्यात पुढील आठवडाभर हवामान कोरडे असण्याचा अंदाज आहे. त्यामुळे रात्रीचे किमान तापमान सरासरीखालीच राहणार असून दिवसाच्या कमाल तापमानात काही प्रमाणात वाढ होण्याची शक्यता आहे. यामुळे उन्हाचा चटका वाढण्याची शक्यता आहे.
आपल्या नेहमीच्या वेळापत्रकापेक्षा जवळपास महिनाभर जास्त आपला मुक्काम लांबवून मान्सून नुकताच परतला आहे. संपूर्ण राज्यातच सध्या कोरड्या हवामानाची स्थिती निर्माण झाली आहे. दिवाळीच्या कालावधीत पाऊस विश्रांती घेण्याची शक्यता आठवड्यापूर्वीच व्यक्त करण्यात आली होती. हा अंदाज बरोबर ठरला असून मध्य महाराष्ट्रात बहुतांश भागांत, तर कोकणात काही ठिकाणी रात्रीच्या किमान तापमानात घट झाली आहे. विदर्भ आणि मराठवाड्यातही काही भागांत किमान तापमानात घट होत आहे.
दोनच दिवसांपूर्वी राज्यात सर्वच भागांत रात्रीचे किमान तापमान २० अंशांच्या पुढे होते. मध्य महाराष्ट्रात २१ ते २२ अंश, मराठवाडा आणि विदर्भात २१ ते २३ अंश, तर मुंबई परिसरासह कोकण विभागात रात्रीचे किमान तापमान २४ ते २६ अंश सेल्सिअसच्या दरम्यान होते. हे तापमान सरासरीच्या तुलनेत १ ते ४ अंशांनी अधिक होते. त्यात दोनच दिवसांत मोठा बदल झाला आहे. रात्रीचे किमान तापमान कमी होत असून, दिवसाचे कमाल तापमान वाढत आहे. सध्या सर्वत्र रात्रीचे किमान तापमान सरासरीच्या खाली आले आहे. मध्य महाराष्ट्रात किमान तापमान १२ ते १४ अंशांपर्यंत खाली आले आहे. कोकणात १९ ते २२, मराठवाडय़ात १४ ते १७, तर विदर्भात १७ ते १८ अंशांपर्यंत रात्रीचे तापमान खाली आले आहे. राज्यातील निचांकी तापमान महाबळेश्वर येथे १२.२ अंश सेल्सिअस नोंदिवले गेले.
