इंडिया दर्पण ऑनलाईन डेस्क – वेगळ्या विषयांचे चित्रपट देणारे दिग्दर्शक म्हणून केदार शिंदे ओळखले जातात. या वर्षात ‘महाराष्ट्र शाहीर’ नंतर त्यांचा सलग दुसरा चित्रपट आला आणि तो देखील चांगलाच हिट झाला. सहा दिग्गज अभिनेत्रींच्या अभिनयाने सजलेला ‘बाईपण भारी देवा’ हा चित्रपट ३० जून रोजी प्रेक्षकांच्या भेटीला आला. आणि लगेचच हिट झाला. लोकांनी याला चांगला प्रतिसाद दिला, परिणामी बॉक्स ऑफिसवर चांगली कमाई झाली.
दिग्दर्शक केदार शिंदे यांच्या या चित्रपटात बायकांनी एकत्र येत जी काही धमाल केली आहे ती पडद्यावर पाहणे प्रेक्षकांना चांगलेच भावते आहे. म्हणूनच ‘बाईपण भारी देवा’ सिनेमाने एका आठवड्यातच तब्बल साडे बारा कोटींचा गल्ला जमवला आहे. केदार शिंदे यांनी स्वतःच पोस्ट शेअर करत आपल्या आयुष्यातील सर्व महिलांचे आभार मानले आहेत.
‘बाईपण भारी देवा’ ३० जून रोजी रिलीज झाला. पहिल्याच दिवशी सिनेमाने १ कोटी रुपयांचे कलेक्शन केले. तर विकेंडला ३ दिवसांत ६ कोटी रुपये कमावत बॉक्स ऑफिसवर धुमाकूळ घातला. बायकांचे आयुष्य अनुभवणे आणि तेच चित्रपटात जगणे याची संधी घेत या अभिनेत्रींनी हा चित्रपट चांगलाच गाजवला आहे. विशेष म्हणजे केवळ बायकाच नाही तर संपूर्ण कुटुंब पाहू शकतं, असा हा चित्रपट आहे. सिनेमात दाखवण्यात आलेल्या या बायकांची कहाणी प्रत्येकाला आपलीच कहाणी वाटत आहे. त्यामुळे थिएटरमध्ये महिलांची एकच गर्दी होत आहे. या चित्रपटाचे सर्व शो सर्वत्र हाऊसफुल सुरू आहेत. हा चित्रपट चित्रपटगृहात दणदणीत कमाई करताना दिसत आहे. केदार शिंदे यांनी नुकतंच इन्स्टाग्रामवर फोटो पोस्ट केला आहे.
काय आहे गोष्ट?
या सर्व सहाजणी ‘काकडे सिस्टर्स’ असून प्रत्येकाच्या वेगवेगळ्या तऱ्हा आहेत. सख्ख्या बहिणी असूनही स्पर्धेच्या निमित्ताने बऱ्याच दिवसांनी सगळ्या एकत्र भेटतात. प्रत्येकाच्या आयुष्यात काही ना काही प्रॉब्लेम्स असतात. त्यांचे स्वतःचे आपापसातील काही लहानपणापासूनचे वाद आहेत. त्याचीही झलक यात दिसते. मंगळागौर स्पर्धेसाठी सहा बहिणी एकत्र येतात आणि पुढे काय धम्माल होते हे सिनेमात दाखवलं आहे. एकंदरच उत्तम पटकथा, कमाल दिग्दर्शन, गाणी आणि अफलातून अभिनय यामुळे सिनेमा सरळ मनाला भिडताना दिसतो.
केदार शिंदेंची पोस्ट काय?
‘माझ्या आयुष्यात आलेल्या असंख्य स्त्रियांच्या आशीर्वादाने हे यश मिळालंय. मला जन्म देणारी आई… सांभाळणारी आजी.. लक्ष ठेवणाऱ्या मावश्या… मला लग्नानंतर सांभाळून घेणारी माझी बायको.. आनंद देणारी माझी मुलगी.. माझ्या प्रत्येक कामात सहभागी असणारी माझी सहकारी, अभिनेत्री आणि माझ्या कामावर प्रेम करणारी स्त्री प्रेक्षक.. हे तुमचं यश आहे. या सिनेमातली प्रत्येक स्त्री जी पाठीशी खंबीरपणे उभी राहिली, तिचं हे यश आहे. मी फक्त निमित्त मात्र!! ही स्वामीआई ची कृपा हा सिद्धिविनायकाचा महाप्रसाद…’ अशी पोस्ट केदार शिंदे यांनी केली आहे.
प्रेक्षकांचे आभार
या चित्रपटाने पहिल्या दिवशी एक ते दीड कोटींची कमाई केली होती. त्यानंतर दुसऱ्या दिवशी २.१० कोटी आणि तिसऱ्या दिवशी या चित्रपटाने २.८० कोटींचा गल्ला जमवला होता. या चित्रपटाने पहिल्या वीकएण्डला ६.४५ कोटींचा गल्ला जमवला होता. त्यामुळे पहिल्याच आठवड्याअखेरीस सर्वाधिक कमाई करणारा या वर्षातला सुपरहिट मराठी चित्रपट ठरला होता. केदार शिंदे यांनी प्रेक्षकांचे आभार मानले आहेत. सोशल मीडियावरूनही प्रेक्षक या चित्रपटाचं भरभरून कौतुक करत इतरांना हा चित्रपट आवर्जून पाहण्याचं आवाहन करत आहेत.
