अखेर अभिनेत्री सायली संजीवने सोडले मौन; रिलेशनशिपबद्दल केले हे भाष्य

इंडिया दर्पण ऑनलाईन डेस्क – सध्या क्रिकेटपटू ऋतुराज गायकवाडची धूम आहे. विजय हजारे ट्रॉफीच्या उपांत्यपूर्व फेरीत ऋतुराज गायकवाडने एकाच षटकात ७ षटकार लगावले. असे ७ षटकार मारणारा ऋतुराज गायकवाड हा जगातील पहिला फलंदाज ठरला आहे. त्याचबरोबर त्याने दुहेरी शतकही झळकावले. ऋतुराज गायकवाडने नवा वर्ल्ड रेकॉर्ड रचला आहे. त्याच्या या खेळीचे सर्वत्र कौतुक केले जात आहे. आणखी एका कारणासाठी देखील ऋतुराज काही काळापासून चर्चेत आहे. ते म्हणजे ऋतुराज गायकवाड आणि मराठी चित्रपटसृष्टीतील लोकप्रिय अभिनेत्री सायली संजीव रिलेशनशिपमध्ये असल्याच्या चर्चा आहेत. काही महिन्यांपूर्वीच सायली संजीवने आपल्या रिलेशनशिपबद्दल भाष्य केले होते.

सायली संजीवला मराठी चित्रपटसृष्टीतील लोकप्रिय अभिनेत्री म्हणून ओळखले जाते. सायली आणि ऋतुराजच्या अफेअरच्या चर्चा आयपीएलपासून रंगल्या आहेत. सायलीच्या वनपीस घातलेल्या फोटोवर ऋतुराजने कमेंट केली आणि या चर्चा सुरु झाल्या. ऋतुराजने तिच्या त्या फोटोवर वाह अशी कमेंट करत हार्ट इमोजी शेअर केले होते. त्यावर सायलीनेही हार्ट इमोजी शेअर करत त्याला रिप्लाय दिला. त्यानंतरच त्यांच्या अफेअरच्या चर्चांना उधाण आले होते. काही महिन्यांपूर्वी ‘बस बाई बस’ या कार्यक्रमावेळी सायली संजीवने यावर थेट भाष्य केले होते.

यावेळी सायलीबरोबर अभिनेता शरद केळकरही सहभागी झाला होता. या कार्यक्रमात सहभागी महिलांनी सायलीला ऋतुराजबद्दल प्रश्न विचारला. सायलीला ऋतुराजबद्दलचा प्रश्न विचारल्यानंतर शरदने तिची थट्टा करण्यास सुरुवात केली. ‘जर तो तुझा मित्र असेल तर प्लीज मला त्याच्याकडून एक बॅट हवी आहे… माझ्यासाठी एक बॅट मागून घे’ असे त्याने तिला गंमतीत म्हटले. त्यावर तिनेही ‘मी तुम्हाला बॅट मिळवून देऊ शकते’, असे म्हटले.

त्यानंतर तिने ऋतुराजसोबतच्या रिलेशनशिपबाबत सांगितले. सायली म्हणते, “मी आणि ऋतुराज फार चांगले मित्र आहोत. खरं सांगायचं तर आयपीएल खेळणाऱ्यांपैकी दोघे तिघे माझे चांगले मित्र आहेत. त्यातील एक रॉयल चॅलेंजर बँगलोर, ऋतुराज चेन्नई सुपरकिंग्ज, तुषार देशपांडे हा पण चेन्नई सुपरकिंग्जमध्ये आहे. हे सर्वजण माझे खूप चांगले मित्र आहेत. एकतर ते तिघेही माझ्यापेक्षा वयाने लहान आहेत. त्यांना माझी ‘काहे दिया परदेस’ ही मालिका फार आवडायची. ते ती मालिका बघायचे. मला ही गोष्ट कळल्यानंतर मी जरा चकितच झाले,” असे तिने सांगितले. सायलीच्या या उत्तरानंतरही हे दोघे रिलेशनशिपमध्ये आहेत की नाही याबद्दल अजूनही चाहत्यांना स्पष्टता आलेली नाही. तिने मात्र यावर टाळाटाळ केली आहे.

‘काहे दिया परदेस’ या मालिकेतून सायली घराघरात पोहोचली. तिने आतापर्यंत अनेक चित्रपट आणि मालिकांमध्ये काम केले आहे. सौंदर्य आणि उत्तम अभिनय यांच्या जोरावर सायलीने आपले स्थान निर्माण केले आहे. ‘हर हर महादेव’ या चित्रपटात ती छत्रपती शिवाजी महाराज यांच्या पत्नीची भूमिका साकारते आहे. त्याबरोबरच तिची प्रमुख भूमिका असलेला ‘गोष्ट एका पैठणीची’ हा चित्रपटही लवकरच प्रदर्शित होणार आहे.

https://twitter.com/SayaliSanjeev/status/1593094504705585152?s=20&t=aDEZx8QtqAfJG1_kCpVtQA

Marathi Actress Sayali Sanjiv on Relationship
Entertainment TV Show Ruturaj Gaikwad