नाशिक (इंडिया दर्पण वृत्तसेवा)- नाशिक येथील जय भवानी रोडवर वाहन शिकणाऱ्या परप्रांतीय व्यक्तीने एका कारला धडक देऊन अरेरावी करत मराठी भाषिकांबद्दल अपमानास्पद शब्द वापरल्याची घटना घडली. त्यानंतर मनसेच्या कार्यकर्त्यांच्या त्यांच्या स्टाईलमध्ये या परप्रांतीय व्यक्तीचा समाचार घेत चोप दिला. मुंबई, ठाणे नंतर नाशिकमध्ये हा वाद आता सुरु झाला असून त्याची नाशिकमध्ये चांगलीच चर्चा आहे. या घटनेचा व्हिडिओ सोशल मीडियावर चांगलाच व्हायरल झाला आहे.
याबाबत मनसे पदाधिकारी नितीन पंडित म्हणाले की, एका परप्रांतीयाने मराठी कुटुंबाच्या वाहनाला धडक दिली. यावर नुकसान भरपाई न देता उलट त्या कुटुंबावर दादागिरी करण्याचा प्रयत्न केला. तुम मराठी लोग भंगार हो, तुम्हारी गाडी भंगार है अशा मुजोरी शब्दात वाद घातला. त्यानंतर हा प्रकार आमच्या कानावर आला. आम्ही तिथे पोहचलो, तेव्हा तो उर्मटपणे बोलू लागला. मी मराठी बोलणार नाही, काय करायचे ते करा अशी भाषा वापरली. त्यानंतर मनसे स्टाईलने आम्हाला समज द्यावी लागली असे त्यांनी सांगितले.
पीडित मराठी कुटुंबाने मनसे पदाधिकाऱ्यांकडे त्यांची व्यथा मांडली. त्यानंतर मनसेच्या कार्यकर्त्यांच्या त्यांच्या स्टाईलमध्ये या परप्रांतीय व्यक्तीचा समाचार घेतला. नाशिकमध्ये गेल्या काही दिवसात या घटना घडत असल्यामुळे मराठी माणसाच्या मदतीला तातडीने मनसेचे कार्यकर्ते दाखल होत आहे.
