इंडिया दर्पण ऑनलाईन डेस्क
मुंबईः महाराष्ट्राच्या राजकारणाचा आज जो चिखल झाला, त्याला उद्धव ठाकरेच जबाबदार असल्याची टीका राज ठाकरे यांनी केली. स्वत:ला मुख्यमंत्री व्हायचे, म्हणून त्यांनी जनतचे मतदान नाकारून काँग्रेसशी बस्तान बांधले. बाळासाहेबांच्या विचारांशी बेईमानी केली, असे ते म्हणाले.
आपली विचारप्रणाली सोडून दुसऱ्याच्या विचारप्रणालीत बसायचे, त्यानेही ती गोष्ट स्वीकाराची, अशी गोष्ट मी कधी पाहिली नाही. माझ्या शिवसेनेची काँग्रेस होताना दिसली, तर मी त्याच दिवशी दुकान बंद करेन असे बाळासाहेब म्हणाले; पण यांनी त्यांच्याच बाजूला दुकान मांडले. त्यांनी बाळासाहेबांच्या नावाच्या आधीचे हिंदुह्रदयसम्राट काढून टाकले, अशा शब्दांत उद्धव यांच्यावर हल्ला चढवत ते म्हणाले, की उद्धव यांच्या व्यक्तिगत महत्वकांक्षेतून हे झाले. मला स्वत:ला मुख्यमंत्री व्हायचे यासाठी भाजपशी सौदा गेला. मोदी, अमित शाह वेगवेगळ्या सभेत आमचा मुख्यमंत्री देवेंद्र फडणवीस असे सांगत होते, त्यावेळी का आक्षेप घेतला नाही, असा सवाल त्यांनी केला.
सुरुवातीला शरद पवार यांच्यांशी बोलायला सुरुवात केली. अजित पवार यांना भ्रष्टाचाराच्या प्रकरणार तुरुंगात टाकणार होते, त्यांच्यासोबत तुम्ही शपथविधी करता. इतक्या स्वार्थाने तुम्ही विचारप्रणालीला मागे सारले. लोकांनी मत दिले त्याला लाथाडले. याची जर महाराष्ट्राला चटक लागली तर राजकारण कुठे जाईल? उद्या या गोष्टी वाढल्या तर कोण राहील इथे, अशी टीका करून राज म्हणाले, की मुख्ममंत्री एकनाथ शिंदे यांनी जी गोष्ट केली, ती अत्यंत योग्य केली. कारण तुम्ही विचारप्रणाली, बाळासाहेब सर्वांना बाजूला काढले. त्यांची वैयक्तिक महत्वकांक्षादेखील असेल. काँग्रेससोबत जाऊन बसणे हे कोणालाच पटले नसेल. इतकी वर्षे ज्यांना विरोध केला, त्यांच्यासोबत सत्तेत बसणे हे कोणालाच आवडले नाही. ही गोष्ट आधीच झाली असती; पण मध्ये कोविड आला, असे ते म्हणाले.
राजकारणात काही गोष्टींच्या सीमा आपण आखल्या पाहिजेत. तुम्ही एखाद्या पक्षाचे नाव आणि चिन्ह काढून घेता कामा नये. ‘पॉलिटीकल एथिक्स’ नावाची गोष्ट असते की नाही? की आपल्याला सर्वच गुंडाळून टाकायचे? असा प्रश्न त्यांनी विचारला. मला पटत नाहीत त्या गोष्टी शिंदेंकडून झाल्या असतील; पण तो माणूस दिलदार मनाचा आहे, असे ते म्हणाले. देवेंद्र फडणवीस आणि एकनाथ शिंदे हे कॉम्बिनेशन मस्त आहे. भाजप-शिंदे सत्तेत येतील; पण त्यांना आमच्या आमदारांची गरज लागेल, असे राज म्हणाले.
