इंडिया दर्पण ऑनलाईन डेस्क
यवतमाळः “राज्यातील पहिली शेतकरी आत्महत्या ही उमरखेडमध्ये झाली होती. शेतकरी आत्महत्या करतो, त्यांना बघायला कोणी येत नाही. त्यांचे कुटुंब काय करते, ते ही बघत नाही. कारण आता माणसाची काही किंमतच उरली नाही. आमची मनेच मेली आहेत. जर तुम्ही जिवंत आहात असे वाटत असेल तर आजवर ज्यांना मत दिली, त्यांना नाकारा आणि मनसेला मतदान करा”, असे आवाहन मनसे अध्यक्ष राज ठाकरे यांनी केले.
ते यवतमाळच्या उमरखेड मतदारसंघात बोलत होते. राज यांनी मनसेचे उमेदवार राजेंद्र नजरधने यांच्यासाठी एक प्रचार सभा घेतली. यवतमाळच्या उमरखेड मतदारसंघातील जिल्हा परिषद शाळेच्या मैदानावर त्यांची सभा पार पडली. या वेळी त्यांनी महायुतीसह महाविकास आघाडीवर जोरदार हल्लाबोल केला. “मला प्रत्येक ठिकाणी जाणे शक्य होत नाही. या मतदारसंघात पहिली शेतकरी आत्महत्या झाली होती. उमरखेडमध्ये शेतकरी आत्महत्या करतात, हे बघायला कोणी आले नाही. त्यांचे कुटुंब काय कते हे बघायला कोणी आले नाही. कारण कोणालाच माणसाची किंमत उरली नाही. माणसाची किंमत देशात नाही. परदेशात जाऊन कळते. अमेरिकचे अध्यक्ष ओबामा हे पदावरून खाली उतरत असताना त्यांनी एक कायदा केला होता. जेवढे कुत्रे बॉम्बस्फोटात जातील, त्यांना तुम्हाला परत अमेरिकेत आणावे लागेल. ज्या देशात कुत्र्याची काळजी आहे तर माणसाची किती असेल?” असा सवाल राज यांनी विचारला.
“एवढ्या आत्महत्या होत आहे, त्यावर काहीच नाही. कारण आमची मनेच मेली आहेत. आमच्याकडे तरुण तरुणी जिल्हा सोडून जात आहेत. आमदार, खासदार यांना विचारत नाही. निवडणूक खेळ समजतात. निवडणूक झाली की आम्ही विसरून जाणार. यानंतर पाच वर्षांनी पुन्हा निवडणूक होणार. आमची मनेच मेली आहेत, तुम्ही जर जिवंत आहात असे वाटत असेल तर आजवर ज्यांना मत दिली त्यांना नाकारा”, असे ते म्हणाले.
महाराष्ट्र नवनिर्माण सेनेने विकास आराखडा तयार केला आहे. बाकीच्यांना पुढची काही वर्षे आराम करू द्या. मी विकास कसा होतो, हे पाहिले आहे. मी नाशिकमध्ये रस्ते बनवले. किती वर्षे झाले पाहा, अजूनही ते तसेच आहेत. कंत्राटदारकडून टक्के घेणे बंद झाले की रस्ते चांगले होतात. मला रस्त्यात खड्डा दिसला, तर खड्ड्यात बांधून मारेन असा दम मी कंत्राटदारला दिला होता, असा किस्साही राज यांनी सांगितला.
सगळ्या गोष्टी शक्य आहे. फक्त इच्छा पाहिजे. मला सत्तेच्या खुर्चीचा मोह नाही; पण मला महाराष्ट्राच्या विकासाची स्वप्ने नक्कीच पडतात. राज्यकर्ते आणि राजकीय नेत्यांच्या मेंदूत कमतरता आहे, अशी टीका राज यांनी केली.
