नाशिक (इंडिया दर्पण वृत्तसेवा) – नाशिक महानगरपालिका हद्दीतील थकबाकीदार मालमत्ता कर यांनी आपला मालमत्ता कर व पाणीपट्टी वेळेत भरावा. ज्या मिळकतधारकांनी थकीत मालमत्ता कर अद्यापही भरणा केलेला नाही, अशा मिळकतीधारकांची चलत अथवा स्थावर मालमत्ता जप्तीची कारवाईची मोहीम हाती घेतली जाणार असल्याची माहिती महानगरपालिका प्रशासनाने दिली आहे.
मालमत्ता कर थकबाकीदार करदात्यांकरीता, थकबाकीसह चालु मागणी रक्कम एक रकमी भरणा केल्यास, त्यांना लागु असलेल्या शास्ती व इतर फी मध्ये माहे ऑक्टोंबर ते माहे डिसेंबर-2024 करीता 95 टक्के सवलत व माहे जोनवारी 2025 करीता 85 टक्के सवलत योजना राबविणेत आली आहे.
या सवलत योजनेचा लाभ 41046 मिळकतधारकांनी प्राप्त केला आहे. करदात्यांच्या सोईकरीता, मालमत्ता कर व पाणीपट्टी भरणाकरीता दि. 31/03/2025 पावेतो सर्व शनिवार व रविवार आणि सार्वजनिक सुट्टीचे दिवशी, सर्व विभागीय कार्यालये व उपकार्यालयातील नागरी सुविधा केंद्र हे करांचा भरणा स्विकारणेकामी नियमितपणे कार्यालयीन वेळेत सुरु ठेवण्यात येत आहे.
सर्व थकबाकीदार करदात्यांकरीता, सवलतीची शेवटची संधी असल्याने, सदर संधीचा लाभ घेण्यात यावा अन्यथा सवलतीचा कालावधी संपुष्टात आल्यानंतर नाईलाजास्तव अधिनियमातील तरतुदीनुसार जप्तीची कटुकारवाई करणेत येईल याची थकबाकीदार करदात्यांनी नोंद घ्यावी. असे आवाहन मनपा आयुक्त तथा प्रशासक मनिषा खत्री यांनी केले आहे.
