इंडिया दर्पण ऑनलाईन डेस्क
मुंबई येथे आझाद मैदानावर मनोज जरांगे पाटील यांचा आज आमरण उपोषणाचा तिसरा दिवस असून काल रात्रीपासून त्यांची प्रकृती प्रचंड खालावली आहे. या पार्श्वभूमीवर मुंबईत हालचाली वाढल्या आहे. दरम्यान मनोज जरांगे पाटील यांनी आज सकाळी पत्रकार परिषद घेत मोठी घोषणा केली आहे.त्यांनी उद्यापासून पाणी पिणं बंद करणार असल्याचे म्हटले. त्यानंतर आज सायंकाळी पुन्हा पत्रकार परिषद घेत त्यांनी कोर्टात अडचण असेल तर आरक्षण देतांना सरसकट शब्द वापरु नका.
जरांगे पाटील यांनी यावेळी सांगितले की, मराठा आरक्षणविषयक मंत्रिमंडळ उपसमितीची आज दोन वेळा बैठक झाली. याबाबत मला कल्पना नाही. सर्वोच्च न्यायालय आणि केंद्र सरकारचा या शब्दाला काही आक्षेप असेल तर त्याला दुसरा पर्याय आहे. सरकारकडे ५८ लाख कुणबी नोंद आहेत. याच आधारावर मराठा आणि कुणबी एक आहे यावर शासन निर्णय काढावा असा नवा पर्याय दिला. तसेच ज्या मराठ्यांच्या कुणबी नोंदी सापडलेल्या आहे किंवा ज्या मराठ्यांच्या कुणबी नोंदी सापडलेल्या नाहीत त्यांची पोटजात, उपजात म्हणून आरक्षण द्या, आरक्षण देतांना सरसकट शब्दच वापरु नका, असा नवा सल्ला मनोज जरांगे यांनी सरकारला दिला आहे.
यावेळी त्यांनी कुणालाही त्रास देऊ नका, सर्वांनी शांतता ठेवा, गोंधळ घालणार असेल तर आपल्याकडे कोणीच येणार नाही, भेटीसाठी आलेल्यांना त्रास देऊ नका, आंदोलकांनी सावध रहावे असे आवाहन केले.
