इंडिया दर्पण ऑनलाईन डेस्क – मणिपूरमध्ये पुन्हा एकदा हिंसाचार सुरू झाला आहे. गोळीबाराच्या घटनेत नऊ जण जखमी झाले आहेत. ही घटना इम्फाळ पूर्व जिल्ह्यातील खमेनलोक भागात घडली, जिथे सोमवारी रात्री उशिरा बंडखोर संघटनेचे लोक आणि गावकऱ्यांमध्ये गोळीबार झाला, यात दोन्ही बाजूचे नऊ जण जखमी झाले. एका पोलीस अधिकाऱ्याने सांगितले की, याआधी तीन जण जखमी झाल्याची माहिती आहे. मात्र, गोळीबार सुरूच राहिल्याने जखमींची संख्या नऊ झाली.
या वादात गोळीबार
पोलिसांचे म्हणणे आहे की बंडखोरांचे काही तात्पुरते बंकर आणि वॉच टॉवर गावकऱ्यांनी जाळले, त्यानंतर दोन्ही बाजू समोरासमोर आल्या आणि प्रचंड गोळीबार झाला. ज्या ठिकाणी गोळीबार झाला ते ठिकाण मेईटी बहुल इम्फाळ पूर्व जिल्हा आणि आदिवासीबहुल कांगपोकपी जिल्ह्याच्या सीमेवर आहे. संवेदनशील परिसर असल्याने येथे अनेक हिंसक घटना घडल्या आहेत. सध्या खमेनलोकमध्ये मोठ्या प्रमाणात पोलीस बंदोबस्त तैनात करण्यात आला आहे.
बिष्णुपूरमध्ये एक बंडखोर ठार, दोन जखमी
दुसर्‍या घटनेत, बिष्णुपूर जिल्ह्यातील गोविंदपूर गावात सुरक्षा दलांशी झालेल्या चकमकीत एक बंडखोर ठार झाला आणि इतर दोन जखमी झाले. मणिपूरमध्ये गेल्या एका महिन्यापासून सुरू असलेल्या हिंसाचारात किमान १०० लोकांचा मृत्यू झाला असून ३१० जण जखमी झाले आहेत. वास्तविक, मणिपूरमधील मीतेई समुदाय त्यांना अनुसूचित जमातीचा दर्जा देण्याची मागणी करत आहे. या विरोधात ३ मे रोजी राज्यातील पहाडी जिल्ह्यांमध्ये आदिवासी एकता मोर्चा काढण्यात आला, त्यानंतर राज्यात हिंसाचार उसळला. राज्यातील १६ पैकी ११ जिल्ह्यांमध्ये संचारबंदी लागू आहे. त्याचबरोबर संपूर्ण राज्यात इंटरनेट सेवा बंद करण्यात आली आहे.
Manipur again Violence 9 Injured
