नाशिक (इंडिया दर्पण वृत्तसेवा) – सिन्नरचे आमदार व राज्याचे कृषी मंत्री माणिकराव कोकाटे व त्याचे बंधु सुनील कोकाटे यांना नाशिक जिल्हा न्यायालयाने दोन वर्षाची शिक्षा ठोठावली. त्यानंतर दोन तासातच त्यांना जामीन मंजूर करण्यात आला. न्यायालयाने शिक्षा सुनावल्यानंतर त्यांनी जामीनसाठी अर्ज दाखल केला होता. यावर तातडीने सुनावणी झाली. या सुनावणीत त्यांना १५ हजार रुपयांच्या जात मुचलक्यावर जामीन मंजूर करण्यात आला. सत्र न्यायालयात अपील करण्यासाठी ३० दिवसांची मुदत देण्यात आली आहे.
या कारणाने शिक्षा
१९९५ ते १९९७ या काळात माणिकराव कोकाटे व त्यांचे बंधू सुनील कोकाटे यांनी शासनाकडून ज्या सदनिका मिळतात. त्या सदनिका घेतल्या होत्या. त्यावेळेस त्यांनी सांगितले होते की आमचे उत्पन्न कमी आहे. आम्हाला दुसरे घर नाही. त्या सदनिका त्यांना शासनाच्या माध्यमातून मिळाल्या होत्या. त्यावेळेस माजी मंत्री तुकाराम दिघोळे यांनी या प्रकरणी याचिका दाखल केली होती. आज त्याचा निकाल समोर आला आहे. त्यात दोन वर्षाची शिक्षा ठोठावली.
सरकारवाडा पोलिस स्टेशनमध्ये गुन्हा
कागदपत्रांची फेरफार आणि फसवणूक केल्याचा आरोप करत माजी मंत्री दिघोळे यांनी याचिका दाखल केली होती. याबाबतचा गुन्हा नाशिकच्या सरकारवाडा पोलिस ठाण्यामध्ये दाखल करण्यात आला होता. कोकाटे बंधुसह इतर दोघांचा आरोपीत समावेश होता. पण, कोर्टाने त्यांना शिक्षा सुनावली नाही.
हा आहे लोकप्रतिनिधी कायदा
लोकप्रतिनिधीला दोन किंवा त्यापेक्षा जास्त वर्षाची कारावासाची शिक्षा सुनावल्यास त्याचे सभागृह सदस्यत्व रद्द होते. पण, या शिक्षेनंतर आ. कोकाटे यांना जामीन मिळाला आहे. त्यामुळे ते सत्र न्यायालयात ३० दिवसांची मुदतीत अपील दाखल करणार आहे.
