इंडिया दर्पण ऑनलाईन डेस्क
मालेगावः शेतकऱ्यांना परत एकदा मी कर्जमुक्त करून दाखवणार म्हणजे दाखवणारच असा निर्धार करीत शिवसेना पक्षप्रमुख उद्धव ठाकरे यांनी, ‘सोयाबीनला हमी भाव देणार आहे. आठ दिवसांनी तुम्ही सरकार बदलून दाखवा, मी तुमचे नशीब बदलून दाखवतो,’असे आश्वस्त केले. तुम्ही केवळ सरकार नाही बदलणार, तर तुमचे नशीबदेखील बदलवणार असल्याचे ते म्हणाले.
मालेगावमध्ये आयोजित करण्यात आलेल्या प्रचारसभेत ते बोलत होते. काळोख बदलण्यासाठी तुमच्या हातात मशाल दिली आहे. गद्दारांचा भ्रष्ट कारभार बदलण्यासाठी, जाळण्यासाठी तुमच्या हाती मशाल दिली आहे. आपल्यासमोर गद्दार तर उभा आहेच; पण अजून दोन मांजर उभे आहेत त्यांना मध्ये येऊ देऊ नका. भाजपच्या पोटात गोळा आला आहे, असे सांगून ठाकरे म्हणाले, की आजही मुस्लिम बांधव येऊन भेटत आहेत. देवेंद्र फडणवीस म्हणतात धर्मयुद्ध करा; पण आधी कर्म सांग. मग, धर्मयुद्ध कर. मी पुन्हा विजयाच्या सभेसाठी येईल. अद्वय हिरे यांना निवडून द्या. गद्दार सांगतो, की माझे माझी आणि उद्धव ठाकरे यांचे संबंध आहेत, ते मी तोडून टाकले आहेत. यापुढे कोणताही गद्दार मालेगावात निवडून येणार नाही. तुमच्या मतदार संघाला लागलेला कलंक पुसून टाकायची संधी आहे. गद्दाराने किती पैसा वाटला, कारण त्यांच्याकडे पैशाचा महापूर आहे, त्या पैशात तुमचे आयुष्य विकू नका.
गेल्यावेळी मी गद्दारांवर काही बोललो नव्हतो. तेव्हा गद्दाराने दाखवले, की मी काही बोललो नाही. आज मात्र गद्दारांचा ‘ भुसा’ पाडणार असल्याचे म्हणत ठाकरे यांनी दादा भुसे यांच्यावर टीका केली. अन्नाची शपथ घेवून सांगतो, गद्दारी करणारी ही ओलाद गाडल्याशिवय राहणार नाही, असा निर्वाणीचा इशारा त्यांनी दिला. ज्याने खोट्या केसेस केल्या, तो किती मोठा ‘दादा’ असू दे त्याला तुरुंगात टाकल्याशिवाय मी राहणार नाही, असे सांगून ते म्हणाले, की माझे वडील चोरले. पक्ष चोरला. तुमच्या वडिलांचे कर्तृत्व काय, असा सवाल ठाकरे यांनी केला. महाराष्ट्रातील शिवसेना लुटून तुम्ही गुजरातला दिली, असा टोला त्यांनी मुख्यमंत्री एकनाथ शिंदे यांना लगावला.
