मालेगाव – जिल्हा बँकेने थकीत कर्ज वसूलीसाठी जप्त केलेल्या ८ ट्रॅक्टरचा लिलाव करुन १६ लाख २६ रुपयाची वसूली केली. शासन मान्यता प्राप्त मुल्यांकनकार यांच्याकडून मूल्यांकन प्राप्त करून ही लिलावप्रक्रिया पार पडली आहे. या लिलाव प्रक्रियेत चांगला प्रतिसाद मिळाला. लिलाव करण्यात आलेले टॅक्टरचे मालक हे जिल्हा बँकेचे १० ते १५ वर्षापूर्वीचे थकबाकीदार आहेत. बँकेने वारंवार कर्ज मागणी नोटीसा देऊनही व सौजन्याने तगादे करूनही थकीत कर्ज रक्कमेचा बँकेकडे भरणा केला नसल्यामुळे सदरची कार्यवाही करण्यात आल्याचे बँकेतर्फे सांगण्यात आले. सदर लिलावा प्रसंगी बँकेचे सरव्यवस्थापक नितीन ओस्तवाल, व्यवस्थापक राजेंद्र भामरे तालुक्यातील विभागीय अधिकारी गोरख जाधव, मालेगांव तालुक्यातील वसुली अधिकारी तसेच केंद्र कार्यालयातील कर्जवसुली विभागातील मुख्याधिकारी अरुण थेटे, रमेश शेवाळे, व विका संस्थेचे सचिव यांनी लिलाव प्रक्रियेस उपस्थित राहून सहकार्य केले आहे.
जिह्यातील सर्व थकबाकीदार सभासदांनी कटू कायदेशीर कारवाई टाळून आपला थकबाकीचा भरणा करून बँकेच्या सामोपचार योजनेमध्ये थकबाकीदारांसाठी भरघोस सवलत देऊ केलेली असल्याने जास्तीत जास्त थकबाकीदारांनी सदर योजनेचा लाभ घेऊन थकबाकीचा भरणा करून बँकेस सहकार्य करण्याचे व लिलावाची कटुता टाळावी असे बँकेचे प्रशासक कदम व मुख्य कार्यकारी अधिकारी पिंगळे यांनी बँकेतर्फे आवाहन केले. पुढील लिलाव दिनांक २१.०२.२०२२ रोजी कळवण २३ ट्रॅक्टर येथे व दिनांक २३.०२.२०२२ रोजी ३४ ट्रॅक्टर लिलाव पेठ दिनांक २४.०२.२०२२ रोजी १६ ट्रॅक्टराचा निफाड येथे होणार आहेत.
