इंडिया दर्पण ऑनलाईन डेस्क
इंद्रायणी नदीवरील कुंदमळा येथील पूल कोसळल्यानंतर माजी सनदी अधिकारी महेश झगडे यांनी धक्कादायक माहिती दिली आहे. त्यांनी पुणे महानगरपालिका आयुक्त असतांना त्यांनी रिंग रोडसाठी फिरत असतांना एका पुलाविषयी फेसबुकमध्ये फोटोसह पोस्ट टाकली आहे. हा पूल पूर्णपणे बांधलेला होता, पण दोन्ही बाजूंनी रस्ताच नव्हते! दोन्ही टोकांवर रस्ता नसतानाही हा पूल का बांधण्यात आला, याचे उत्तर मला मिळाले नाही (खाली फोटो). हा खर्च पूर्णपणे अनावश्यक होता. हाच निधी तिथे वापरण्यात आला असता, जिथे पुलाची तातडीची गरज होती, तर त्याचा निश्चितच जनतेला फायदा झाला असता.
झगडे यांनी पोस्टमध्ये लिहले आहे की, महानगर आयुक्त, पीएमआरडीए या पदावर असताना, २०१६ मध्ये मी संपूर्ण ७४०० चौ. कि.मी.चा परिसर सातत्याने फिरत असे. पुणे परिसरातील वाहतूक कोंडी सोडविण्यासाठी, १९८७ साली प्रादेशिक नियोजन आराखड्यात रिंग रोडचे नियोजन करण्यात आले होते. पण माझ्यापूर्वीचे अधिकारी “कशात” तरी इतके व्यग्र होते की, २९ वर्षे तो रिंग रोड प्रत्यक्षात आणण्याची त्यांना फुरसतच मिळाली नाही.
मी रिंग रोड तयार करण्याचा निर्णय घेतला आणि संपूर्ण ११० कि.मी.चा रस्ता स्वतः अधिकाऱ्यांच्या टीमसह—कधी पायी, कधी वाहनाने—प्रत्यक्ष फिरून पाहिला. अशाच एका पाहणी दौऱ्यात, देहूपुढे इंद्रायणी नदीवर सार्वजनिक बांधकाम विभागाकडून एक पूल बांधलेला दिसून आला.
हा विनोद समजावा की देशाच्या प्रशासनाचे दुर्दैव म्हणावे—हा पूल पूर्णपणे बांधलेला होता, पण दोन्ही बाजूंनी रस्ताच नव्हते! दोन्ही टोकांवर रस्ता नसतानाही हा पूल का बांधण्यात आला, याचे उत्तर मला मिळाले नाही (खाली फोटो). हा खर्च पूर्णपणे अनावश्यक होता. हाच निधी तिथे वापरण्यात आला असता, जिथे पुलाची तातडीची गरज होती, तर त्याचा निश्चितच जनतेला फायदा झाला असता.
आता, इंद्रायणी नदीवरील कुंदमळा येथील पूल कोसळून जी जीवितहानी झाली, ती पाहता, अधिकाऱ्यांची कातडी किती बळकट झाली आहे, याची तीव्र जाणीव होते—ही भावना मी यापूर्वीही व्यक्त केली होती. अशा अधिकाऱ्यांनी तरी हा फोटो पाहून आपल्या बेफिकिरीची आणि प्रशासकीय विकृतीची जाणीव ठेवावी, ही किमान अपेक्षा!
