मुंबई (इंडिया दर्पण वृत्तसेवा) – शिंदे गटाचे आमदार भरत गोगावले सध्या शिंदे गटाच्या सर्वांत अस्वस्थ आमदारांपैकी एक आहेत. मंत्रीमंडळाच्या विस्तारातून त्यांना खूप अपेक्षा आहेत आणि ती अपेक्षा धुसर होत असल्याचे त्यांना वाटले की ते आक्रमक होतात. आता त्यांनी असे काही विधान केले की त्यामुळे राष्ट्रवादी काँग्रेसच्या नेत्या रुपाली चाकणकर चांगल्याच भडकल्या आहेत.
रायगड जिल्ह्याच्या पालकमंत्रीपदाचा विषय शिंदे गट आणि राष्ट्रवादी काँग्रेसच्या निमित्ताने चांगलाच चर्चेत आहे. याठिकाणी राष्ट्रवादीच्या आदिती तटकरे आणि शिंदे गटाचे भरत गोगावले दोघांनीही दावा ठोकला आहे. मुख्य म्हणजे गोगावले यांना अद्याप मंत्रीमंडळात समावेशाची केवळ अपेक्षाच आहे. अर्थात तसा त्यांचा हट्टच आहे. पण आदिती तटकरे यांनी तर मंत्रीपदाची शपथ देखील घेतली आहे. त्यामुळे गोगावले यांच्या पदरी निराशा पडू शकते, अशीही शक्यता व्यक्त होत आहे. या पार्श्वभूमीवर भरत गोगावले यांनी आदिती तटकरेंच्या निमित्ताने एक वादग्रस्त विधान केले आणि त्यानंतर त्यांच्यावर चाकणकर भडकल्या.
रायगड जिल्ह्याच्या पालकमंत्रीपदाबाबत दावा करताना गोगावले म्हणाले, ‘मी आदिती तटकरेंपेक्षा चांगले काम करू शकतो. महिला व पुरुष यांच्यात थोडा तरी फरक येतोच ना. त्यांच्यापेक्षा मला आमदारकीचा १५ वर्षांचा जास्त अनुभव आहे. सगळ्यांना बरोबर घेऊन सहाच्या सहा आमदारांसह आमची सगळ्यांची एकच मागणी आहे… रायगडचा पालकमंत्री भरतशेठ.’ महिलांच्या संदर्भात केलेल्या विधानाने रुपाली चाकणकर चांगल्याच भडकल्या आहेत.
काय म्हणाल्या चाकणकर?
आपण त्या जिल्ह्यातून येता जिथे संपूर्ण महाराष्ट्र नतमस्तक होतो. जिथे विश्ववंदनीय छत्रपती शिवाजी महाराजांनी आपल्या राजधानीची स्थापना केली. ज्या रायगडच्या आपल्या राजाने महिलांच्या सन्मानाला जीवापाड जपलं. आपण त्या रायगडमधून येता जिथे छत्रपती संभाजी महाराजांनी आपली पत्नी येसूबाई यांना ‘सखी राज्ञी जयती’ असा सन्मान करून त्यांच्या अनुपस्थित राज्यकारभार चालवण्याचा हक्क दिला. त्यामुळे महिलांच्या सन्मानाची जाणीव सर्वात जास्त तर आपल्याला असायला हवी. आपण केलेल्या वक्तव्याचा मी तीव्र निषेध व्यक्त करते, या शब्दांत चाकणकर यांनी गोगावलेंचा समाचार घेतला आहे.
स्त्री-पुरुष मानसिकता
गोगावलेंच्या बोलण्यातून त्यांच्या पुरुषी मानसिकतेचे दर्शन सबंध महाराष्ट्राला होत आहे, अशी टीका चाकणकर यांनी केली. राजकारण राजकारणाच्या ठिकाणी राहिले. पण महाराष्ट्रातील कोणतीही महिला मग ती मंत्रीपदावर विराजमान असलेली असो किंवा ती सामान्य गृहिणी असो ती आज कोणत्याही पुरुषापेक्षा कमी नाही. आपल्या या वक्तव्यामधून आपल्या पुरुषी मानसिकतेचे दर्शन सबंध महाराष्ट्राला होत आहे, असेही चाकणकर ट्विटमध्ये म्हणतात.
