मुंबई (इंडिया दर्पण वृत्तसेवा) – राज्यातील सत्ता संघर्ष आणि शिवसेना फुटीतून निर्माण झालेला अभूतपूर्व राजकीय धुराळा अद्यापही मिटलेला नाही. असे असतानाच आता पुन्हा राजकीय घडामोडींना ऊत झाला आहे. निमित्त आहे ते विधान परिषद सभापतीपद निवडीचे. हिवाळी अधिवेशनाच्या तोंडावर सभापतीपद आपल्याकडे कसे घेता येईल, यासाठी भाजपने चाचपणी सुरू केली आहे. सध्या रिक्त असलेल्या या पदावर भाजपच्या सदस्याची निवड करण्यासंदर्भात हालचाली सुरू असल्याची माहिती सूत्रांनी दिली आहे.
सद्यस्थितीत विधानपरिषदेच्या ७८ पैकी २१ जागा रिक्त आहेत. सभागृहाचे संख्याबळ ५७ इतके आहे. भाजपकडे २२ सदस्य आहेत. निवडणूक झाली तर ती जिंकण्यासाठी भाजपला २९ मते लागणार आहेत. म्हणजेच आणखी सात मतांची गरज लागणार आहे. रासपचे महादेव जानकर हे नाराज असले तरी ते भाजपसोबत असतील, असे मानले जात आहे. तसेच अपक्ष व लहान पक्षांच्या मदतीने हे संख्याबळ गाठता येईल का, याची चाचपणी केली जात असल्याचे समजते.
विधान परिषदेचे उपसभापतीपद हे उद्धव ठाकरे गटाच्या डॉ. नीलम गोऱ्हे यांच्याकडे आहे. त्यामुळे सभापतीपद आपल्याकडे घेण्यात भाजपला विशेष स्वारस्य असल्याचे सांगितले जात आहे. नागपूर अधिवेशनात पहिल्या एक – दोन दिवसातच सभापतीपदाची निवड करावी, असे भाजपचे प्रयत्न आहेत. विधानसभेचे उपाध्यक्षपद राष्ट्रवादीचे नरहरी झिरवाळ यांच्याकडे कायम ठेवून विधान परिषद सभापती पदासाठी राष्ट्रवादीचा छुपा पाठिंबा मिळविण्याचे प्रयत्नही केले जाऊ शकतात. राज्यपाल नियुक्त १२, स्थानिक स्वराज्य संस्थांमधून निवडून द्यायच्या ९ अशा एकूण २१ जागा सध्या रिक्त आहेत.
यांच्या नावाची चर्चा
भाजपकडून सभापती पदासाठी माजी मंत्री राम शिंदे यांचे नाव सुरुवातीपासूनच चर्चेत आहे. तसेच प्रवीण दरेकर यांचेही नाव आहे. पण दरेकर यांना विस्तारात मंत्री म्हणून संधी दिली जाऊ शकते. शिंदे यांचे नाव चंद्रशेखर बावनकुळे यांच्यावेळी प्रदेशाध्यक्ष पदासाठीही आले होते.
असे आहे सध्याचे संख्याबळ
भाजप – २२
शिवसेना (ठाकरे गट) – ११
राष्ट्रवादी – ९
काँग्रेस – ८
अपक्ष – ४
जदयू, शेकाप, रासप प्रत्येकी – १
Maharashtra Politics MLC Assembly Speaker Election
BJP Congress NCP Shivsena
