मुंबई (इंडिया दर्पण वृत्तसेवा) – शिवसेनेत बंडखोरीचे उठलेले वादळ आणि त्यामुळे संकटात आलेले पक्ष प्रमुख उद्धव छाकरे व महाविकास आघाडी सरकार यांची सध्या मोठी चर्चा होत आहे. मात्र, सेनेत बंडखोरी होण्यामागे मिलिंद नार्वेकर हे सुद्धा कारणीभूत असल्याचे बोलले जात आहे. अनेक सेना नेत्यांनी तर नार्वेकर यांना व्हिलन असे म्हटले आहे. उद्धव ठाकरे यांची भेट घेणे आमदार किंवा मुख्यमंत्र्यांना सोपे नसल्याचे बोलले जात आहे. कारण, उद्धव यांचे राजकीय सल्लागार मिलिंद नार्वेकर हे सुद्धा असल्याचे सांगितले जाते.
शिवसेनेत जेव्हा-जेव्हा नेतृत्वाविरुद्ध बंडखोरी झाली, तेव्हा नार्वेकरांना जबाबदार धरण्यात आल्याचे बोलले जाते. केंद्रीय मंत्री नारायण राणे यांनीही नार्वेकर फोन उचलत नाहीत आणि उद्धव ठाकरेंपर्यंत नेत नाहीत, असा आरोपही केला. पक्षाचे नेते, कार्यकर्ते, आमदार आणि उद्धव ठाकरे यांच्यात सल्लागार अंतर निर्माण करत असल्याचा आरोप झाला. याशिवाय राज ठाकरेंनीही नार्वेकरांना पक्षनेतृत्वाशी असलेल्या भांडणासाठी जबाबदार असल्याचेही सांगितले होते.
५४ वर्षीय नार्वेकर हे आधी उद्धव ठाकरे यांचे वैयक्तिक सहकारी होते. २०१८ मध्ये त्यांना शिवसेनेचे सचिव म्हणून घोषित करण्यात आले. उल्लेखनीय म्हणजे, १९९४ पासून ठाकरे यांच्याशी बोलू इच्छिणारे पक्ष कार्यकर्ते आणि नेते यांच्यात ते एकमेव संपर्काचे ठिकाण होते. याशिवाय ठाकरेंच्या प्रवासाच्या योजनांशी संबंधित प्रत्येक गोष्टीत ते व्यवस्थापकाची भूमिका बजावतात. उद्धव हे मुख्यमंत्री झाल्यापासून त्यांचे दैनंदिन शेड्यूल (भेटी-गाठी, बैठका व अन्य) हे सर्व नार्वेकरच ठरवत असल्याचे सांगितले जाते.
नार्वेकर यांचे ११ वीपर्यंत शिक्षण झाल्याचे बोलले जाते. त्यांनी आपल्या कारकिर्दीची सुरुवात शिवसेनेची विद्यार्थी शाखा भारतीय विद्यार्थी सेना (BVS) मधून केली. १९९० मध्ये ते शाखाप्रमुख पदाच्या मुलाखतीसाठी मातोश्रीवर पोहोचले होते. तेथे उद्धव यांच्यावर ते खूप प्रभावित झाले. त्यामुळेच उद्धव यांनी त्यांना वैयक्तिक सहकारी बनवण्याची ऑफर दिली. उद्धव यांनी अचानक त्यांना स्वीय सचिव करण्याची ऑफर दिल्याचे बोलले जाते. तेव्हापासून राजकीय पार्श्वभूमी नसताना नार्वेकर यांनी राज्याच्या राजकीय पेचप्रसंगात पाऊल ठेवले.
राज्यात राजकीय उलथापालथ सुरू झाल्यानंतरच मुख्यमंत्र्यांनी नार्वेकर यांना सूरतला जाण्यास सांगितले. तेथे एकनाथ शिंदे आणि इतर बंडखोर आमदार उपस्थित होते. आदेश मिळताच नार्वेकर आणि पक्षाचे आमदार रवींद्र फाटक गुजरातला रवाना झाले. तेथे त्यांनी शिंदे यांची मनधरणी केली. त्याशिवाय ठाकरे यांच्यात बोलणे करुन दिले.
दरम्यान, नाराज अनेक आमदारांनी नार्वेकर यांच्याकडे अंगुलीनिर्देश केला आहे. त्यांच्यामुळेच उद्धव यांची भेट होत नाही, उद्धव यांच्याशी संवाद राहत नसल्याचे त्यांचे म्हणणे आहे. तसेच, अनेक सेना नेत्यांच्या तक्रारी उद्धव यांच्याकडे नार्वेकर हेच करीत असल्याचे काही नेत्यांचे म्हणणे आहे.
maharashtra political crisis shivsena milind narvekar who is he
