मुंबई – विधान परिषद निवडणुकीसाठी भारतीय जनता पक्ष आणि शिवसेनेने त्यांचे उमेदवार जाहीर केल्यानंतर आता काँग्रेसनेही त्यांच्या दोन उमेदवारांची घोषणा केली आहे. महाराष्ट्र विधान परिषदेच्या सहा जागांसाठी भारत निवडणूक आयोगाकडून निवडणूक कार्यक्रम घोषित झाला आहे. त्यात धुळे-नंदुरबार, मुंबईतील दोन, कोल्हापूर, नागपूर, अकोला-बुलडाणा-वाशिम या जागांचा समावेश आहे.
महाराष्ट्र विधान परिषदेच्या या सहा जागांची मुदत येत्या मुदत 1 जानेवारी, 2022 रोजी पुर्ण होत आहे. त्यात सध्या धुळे-नंदुरबार मध्ये अमरिशभाई पटेल, मुंबईत काँग्रेसचे भाई जगताप आणि शिवसेनेचे रामदास कदम, कोल्हापूरमध्ये काँग्रेसचे सतेज पाटील, नागपूरमध्ये भाजपचे गिरीश व्यास, अकोला-बुलडाणा-वाशिम येथे शिवसेनेचे गोपीकिशन बाजोरिया हे आमदार आहेत. या रिक्त होणा-या जागेकरिता भारत निवडणूक आयोगाच्या निर्देशानुसार निवडणूक कार्यक्रम घोषित करण्यात आल्याने आचार संहिता लागू झाली आहे.
या निवडणूकीची अधिसूचना 16 नोव्हेंबर रोजी प्रसिद्ध करण्यात आली आहे. नामनिर्देशन पत्रे सादर करण्याचा अखेरचा दिवस दि. 23 नोव्हेंबर (मंगळवार) 2021 आहे. दि. 24 नोव्हेंबर 2021 रोजी नामनिर्देशन पत्रांची छाननी केली जाणार आहे. उमेदवारी अर्ज मागे घेण्याचा अंतिम दिवस शुक्रवार, दि. 26 नोव्हेंबर,2021 असा आहे.
या मतदार संघांसाठी शुक्रवार, दिनांक 10 डिसेंबर, 2021 रोजी सकाळी 8 ते सायंकाळी 4 वाजेपर्यंत मतदान होईल. मंगळवार, 14 डिसेंबर, 2021 रोजी मतमोजणी होणार असून गुरुवार, 16 डिसेंबर, 2021 पर्यंत निवडणूक प्रक्रिया पूर्ण करावयाची आहे, असे निवडणूक आयोगाने कळविले आहे.
भारत निवडणूक आयोगाने कोविड-19 संदर्भातील विस्तृत मार्गदर्शक तत्त्वे तसेच यासंदर्भात अलीकडेच दिनांक 28 सप्टेंबर 2021 रोजीच्या प्रसिध्दीपत्रकान्वये जाहीर केलेल्या मार्गदर्शक सूचनांचे पालन करणे आवश्यक राहील. या मार्गदर्शक सूचना https://eci.gov.in/candidate-political-parties/instructions-on-covid-१९/. संकेतस्थळावर उपलब्ध आहेत. दरम्यान, सोलापूर आणि अहमदनगर या दोन ठिकाणची निवडणूक होणार आहे. या दोन्ही जागांची मुदतही जानेवारीतच संपत आहे. मात्र, ही निवडणूक पुढे ढकलण्यात आल्याचे सांगण्यात येत आहे.
भाजपने कोल्हापूरमधून अमल महाडीक, धुळे-नंदुरबार मध्ये अमरिश पटेल, नागपूरमधून चंद्रशेखर बावनकुळे, अकोला-वाशीम मध्ये वसंत खंडेलवाल आणि मुंबईतून राजहंस धनंजय सिंह यांना उमेदवारी घोषित केली आहे. तर, शिवसेनेने मुंबईतून रामदास कदम यांच्या ऐवजी माजी आमदार सुनिल शिंदे यांच्या नावावर शिक्कामोर्तब केले आहे. तर, अकोला-बुलडाणा-वाशिम या जागेसाठी विद्यमान आमदार गोपीकिशन बाजोरिया यांना पुन्हा शिवसेनेने संधी दिली आहे.
काँग्रेसने यांना दिली संधी
काँग्रेसने कोल्हापूरातून पुन्हा सतेज (बंटी) पाटील यांना संधी दिली आहे. त्यांचा मुकाबला भाजपच्या अमल महाडिक यांच्याशी होणार आहे. तर, धुळे-नंदुरबार मतदारसंघात काँग्रेसने गौरव देवेंद्रलाल वाणी यांना उमेदवारी घोषित केली आहे. त्यामुळे त्यांची लढत भाजपचे विद्यमान आमदार अमरिश पटेल यांच्याशी होणार आहे.
लढत रंगणार
मुंबईत भाजपने राजहंस धनंजय सिंह यांना तर शिवसेनेने सुनिल शिंदे यांना उमेदवारी दिली आहे. तर, अकोला-बुलडाणा-वाशिममध्ये गोपिकिशन बजोरिया यांचा सामना भाजपच्या वसंत खंडेलवाल यांच्याशी होणार आहे.
