इंडिया दर्पण ऑनलाईन डेस्क
नाशिकचे दोन क्रिकेट पंच संदीप चव्हाण व वैभव हळदे यांची महाराष्ट्र क्रिकेट असोसिएशन आयोजित ४ जून पासून सुरु होणाऱ्या महाराष्ट्र प्रीमियर लीग, वुमेन्स महाराष्ट्र प्रीमियर लीग ( एम पी एल २०२५ व डब्लू एम पी एल) या स्पर्धेत पंच म्हणून निवड झाली आहे.
संदीप चव्हाण हे अतिशय अनुभवी क्रिकेट पंच असून २००४ म्हणजे २१ वर्षांपासून अधिक काळ पंच म्हणून काम करत आहेत. ते २०१५ पासूनच बी सी सी आयच्या पॅनलवर आहेत. २००६ साली महाराष्ट्र क्रिकेट असोसिएशनच्या पंच परीक्षेत त्यांनी प्रथम क्रमांक मिळवला होता.
वैभव हळदे देखील २००८ पासून गेली १७ वर्षे स्थानिक व राज्यस्तरीय सामन्यात पंच म्हणून काम करत आहेत. २०२३ च्या महाराष्ट्र क्रिकेट असोसिएशनच्या पंच परीक्षेत त्यांनी नववे स्थान मिळवत महाराष्ट्र क्रिकेट असोसिएशनच्या पंच पॅनल वर स्थान मिळवले.
या प्रतिष्ठित एम पी एल स्पर्धेत पंचगिरी करण्यासाठी निवड झाल्याबद्दल संदीप चव्हाण व वैभव हळदे यांचे नाशिक जिल्हा क्रिकेट असोसिएशनचे चेअरमन विनोद शहा , सेक्रेटरी समीर रकटे व नाशिकच्या सर्व क्रिकेट पंचांनी अभिनंदन करून शुभेच्छा दिल्या आहेत.
