मुंबई (इंडिया दर्पण वृत्तसेवा)- पुणे-नाशिक सेमी हायस्पीड रेल्वे सिन्नर- संगमनेर- नारायणगाव- मंचर- राजगुरुनगर- चाकण मार्गेच करा अशी आग्रही मागणी राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी केली. त्यांनी आज मुंबई येथे महारेलचे व्यवस्थापकीय संचालक राजेशकुमार जयस्वाल यांची भेट घेऊन पुणे-नाशिक हायस्पीड रेल्वेमार्गासंदर्भात चर्चा केली.
यावेळी मंत्री छगन भुजबळ यांनी व्यवस्थापकीय संचालक राजेशकुमार जयस्वाल यांच्याशी झालेल्या चर्चेदरम्यान पुणे-नाशिक सेमी हायस्पीड रेल्वे सिन्नर- संगमनेर- नारायणगाव- मंचर- राजगुरुनगर- चाकण मार्गेच व्हावी अशी आग्रही मागणी त्यांच्याकडे मांडली. यावेळी त्यांनी यासंदर्भात मुख्यमंत्री देवेंद्रजी फडणवीस यांची भेट घेऊन लवकरच केंद्र सरकारला याबाबतचा प्रस्ताव पाठविला जाईल, असे आश्वासन व्यवस्थापकीय संचालक राजेशकुमार जयस्वाल यांनी दिले.
मंत्री छगन भुजबळ यांनी पुणे-नाशिक सेमी हायस्पीड रेल्वे उपरोक्त ठरलेल्या मार्गेच व्हावी, यासंदर्भात राज्याचे मुख्यमंत्री देवेंद्र फडणवीस यांच्याकडे पत्राद्वारे मागणी केलेली आहे. या मार्गात येणाऱ्या नारायणगावमधील जायंट मीटरवेव्ह रेडिओ टेलिस्कोप (जीएमआरटी) वेधशाळेच्या अडचणींसंदर्भात त्यांनी भूमिगत बोगदा किंवा जीएमआरटीला बाधा न येता वळसा घालून असे दोन पर्याय देखील सुचविले आहे. तसेच हा रेल्वेमार्ग संगमनेर मार्गे होणे कसे सर्वदृष्ट्या योग्य व फायदेशीर आहे, हे देखील सविस्तर पत्रातून पटवून दिलेले आहे.
