मुंबई – रायगड जिल्ह्यातील महाड तालुक्यातील तळई येथे दरड कोसळून ३६ जणांचा मृत्यू झाल्याची घटना समोर आली आहे. या दुर्घटनेत ३२ घरे दरड खाली दबली गेली आहे. या घटनेत ३६ जणांचे मृतदेह बाहेर काढण्यात यश आले असून ४० जण बेपत्ता आहे. सकाळपासून येथे बचाव कार्य सुरु असून हेलिकॅाप्टरची मदत घेतली जात आहे. एनडीआरएफसह स्थानिक प्रशासनची टीम देखील या ठिकाणी काम करत आहे.
रात्रीच्या सुमारास ही दरड कोसळल्याचे बोलले जात आहे. पण, हा दुर्गम डोंगराळ भाग असल्याने मदत कार्यात अडथळे आले. पण, एनडीआरएफची टीम ज्यावेळी या ठिकाणी पोहोचली त्यावेळी ही घटना समोर आली. राज्यात अतिवृष्टीमुळे ठिकठिकाणी नुकसान झाले असून यात सर्वात मोठी दुर्घटना ही तळई गावात घडली आहे. सतत कोसळणाऱ्या पावसामुळे अनेक नद्यांना पूर आला आहे. या पूरात कोकणातील काही शहरे आणि गावे पाण्याखाली गेल्याने नागरिकांचे जनजीवन विस्कळीत झाले आहे. या अतिवृष्टीमुळे सातारा आणि रायगड जिल्ह्यातील काही ठिकाणी दरडी कोसळल्या घटनाही घडल्या आहे.
महाड येथील बचाव कार्याचा मुख्यमंत्र्यांनी घेतला आढावा
महाड येथील पूर परिस्थितीबाबत आज मुख्यमंत्री उद्धव ठाकरे यांनी रायगड जिल्हाधिकारी निधी चौधरी यांच्याकडून माहिती घेतली. महाड मधील पूरग्रस्तांच्या बचावकार्याला बचाव पथके आणि हेलिकॉप्टरच्या सहाय्याने सुरुवात झालेली आहे, मात्र अडकलेल्या लोकांनी घराच्या छतावर किंवा उंचावर गेल्यास हेलिकॉप्टर मधील बचाव पथकाला ते दिसतील असे आवाहन प्रशासनाने केले असल्याची माहितीही जिल्हाधिकारी यांनी दिली. बचाव कार्य व रस्त्यावरील अडथळे काढणे लगेच सुरु करावे अशा सूचना मुख्यमंत्र्यांनी दिल्या. पाणी ओसरलं आहे पण महाड तालुक्यातील डोंगराळ भागात काही ठिकाणी पूल आणि रस्ते वाहून गेले असून बचाव पथकांच्या सहाय्याने नागरिकांना संपर्क करून सुरक्षित स्थळी हलवण्यात यावे असेही मुख्यमंत्री म्हणाले. माणगाव पाचाड मार्गे महाड रस्ता, माणगाव महाड महामार्ग, गोरेगाव दापोली रस्ता सुरु झाला आहे अशी माहिती यावेळी जिल्हाधिकारी श्रीमती चौधरी यांनी दिली. कोंझर पासून पुढे तेटघर पर्यंत रस्ता मोकळा करण्यात आला आहे. तेटघर पासून पुढे मोहोप्रेमार्गे आचळोली कडून नातेखिंडला पोहोचता येईल अशी माहितीही त्यांनी दिली.
स्वयंसेवी संस्थांना आवाहन
माणगाव येथे सुमारे २००० फुड पॉकेट्स तयार आहेत. सकाळी १० वाजेपर्यंत अजून २००० अन्नाची पाकिटे तयार होतील. याबाबत तहसीलदार माणगाव ही पाकिटे गरजू लोकांना वितरणाचे नियोजन करीत आहेत. माणगाव तहसील कार्यालयातून महाडकडे एसटी बसने खाण्यापिण्याचे साहित्य रवाना झाले आहे. स्वयंसेवी संस्थांनी देखील यासंदर्भात महाड येथे प्रशासनाच्या संपर्कात राहावे व कपडे, अन्न याची मदत पोहचवावी, असे आवाहन केल्याचेही जिल्हाधिकारी म्हणाल्या.
आरोग्य यंत्रणा सज्ज
महाड मधील परिस्थितीत कोविड तसेच इतर रुग्णांना असुविधा होऊ नये याची खबरदारी घेण्यास मुख्यमंत्र्यांनी सांगितले. बाटू लोणेरे येथे एक वैद्यकीय पथक सज्ज असून त्यांच्याकडे रुग्णवाहिका व इतर सामुग्री आहे अशी माहिती यावेळी देण्यात आली. एमआयडीसी चे अग्निशामक दल देखील मदत कार्यात उतरले आहे.
