लासलगाव – औरंगाबाद येथे एकतर्फी प्रेमातून हत्या करुन फरार झालेला शरण सिंग सविंदर सिंग शेटी (वय २०) या संशयितास लासलगाव येथील गणेश नगर भागातून त्याच्या बहिणीच्या घरातून नाशिकचे पोलीस अधीक्षक सचिन पाटील ,नाशिकच्या अतिरीक्त पोलीस अधीक्षक माधुरी केदार कांगणे व लासलगावचे सहायक पोलिस निरीक्षक राहुल वाघ यांच्या पथकाने गुप्तता पाळीत आज दुपारी दोन वाजेच्या सुमारास काही तासातच ताब्यात घेतले. त्यानंतर या आरोपीला औरंगाबाद पोलिसांच्या ताब्यात देण्यात आले.
याबाबत अधिक माहिती अशी की, वेदांत नगर पोलिस कार्यालयात काल सुखप्रीत कौर उर्फ कशिश प्रतिपाल ग्रंथी या कॉलेज युवतीचा एकतर्फी प्रेमातून तिचा शरण सिंग सविंदर सिंग शेटी याने वार करून खून केला होता. या खूनानंतर शरण सिंग सविंदर सिंग शेटी हा फरारी झाला होता. या फरारी संशयितांचा शोध पोलिस यंत्रणा तातडीने करत होती. याबाबत पोलीस आयुक्तलायातील वेदांतनगर पोलीस कार्यालयाचे पोलीस निरीक्षक सचिन सानप यांनी नाशिकचे नाशिक ग्रामीणचे पोलीस अधिक्षक सचिन पाटील यांना यांना सदर संशयित आरोपी लासलगाव येथील त्याचे बहिणीकडे आला असल्याची माहिती दिली. त्यानुसार खबर मिळताच गुप्तता पाळीत तातडीने नाशिकचे पोलीस अधीक्षक सचिन पाटील, अतिरिक्त पोलिस अधीक्षक माधुरी कांगणे व लासलगावचे सहाय्यक पोलीस निरीक्षक राहुल वाघ ,पोलीस अंमलदार योगेश शिंदे, हवालदार संदीप शिंदे विजय बारगल यांच्या पथकाने रविवारी दुपारी दोन वाजेच्या सुमारास लासलगाव येथील श्री गणेश नगर मधील गणेश मंदिरामागे त्याच्या बहिणीच्या घरात छापा टाकून फरारी झालेल्या शरण सिंग सविंदर सिंग शेटी यास ताब्यात घेतले. त्यानंतर औरंगाबाद पोलिसांचे पथक दाखल झाले आणि आणि आरोपीस ताब्यात देण्यात आले.
