लासलगाव– सेव्हन्थ डे इंग्लिश मीडियम स्कूल येथे शिक्षण घेत असलेल्या जोएल विनोद नाईक या १४ वर्षीय विद्यार्थ्यास मार्केटला नेतो असे सांगून मोटारसायकलवर नंदुरबारकडे नेताना वडीलांनीच ढकलून दिले. या प्रकारानंतर खूनाचा प्रयत्न केल्याबाबत त्याचे वडील विनोद रामसिंग नाईक याचे विरुद्ध लासलगाव पोलीस कार्यालयात गुन्हा दाखल झाला आहे.
याबाबत अधिक माहिती अशी की लासलगाव येथील इंग्लिश मीडियम मिशनरी स्कूलमध्ये जोएल विनोद नाईक हा विद्यार्थी शिक्षण घेत आहे, तो त्याच्या आई समवेत राहतो २१ डिसेंबर रोजी दुपारी साडेबारा वाजेच्या सुमारास त्याचे वडील विनोद रामसिंग नाईक राहणार नागरे, तालुका नवापूर, जिल्हा नंदुरबार यांनी जोएल यास मार्केटमध्ये जाऊन येऊ असे सांगून मोटरसायकलवर बसवले व मोटरसायकल नवापूरच्या दिशेने नेण्यास सुरुवात केली. त्यास त्यांचा मुलगा जोएल याने विरोध केला असता विनोद नाईक यांनी मोटरसायकलवरून मुलगा जोएल यास ढकलून दिल्याने त्यास हात पाय मोडून दुखापत झाली आहे. याबाबत नंदुरबार जिल्ह्यातील विसरवाडी पोलीस कार्यालयात दिनांक ३ जानेवारी २०२२ रोजी फिर्याद दाखल करण्यात आली असता ती लासलगाव पोलीस कार्यालयात काल वर्ग झाली. त्यानुसार विनोद रामसिंग नाईक यांचे विरुद्ध भादंवि ३०७ व ५०६ प्रमाणे गुन्हा दाखल करण्यात आला आहे याबाबत अद्याप कोणालाही अटक झालेली नाही. पोलीस अधीक्षक सोमनाथ तांबे , लासलगावचे सहाय्यक पोलीस निरीक्षक राहुल वाघ यांचे मार्गदर्शनाखाली रामकृष्ण सोनवणे तपास करीत आहेत.
लासलगाव – १४ वर्षीय विद्यार्थ्यास मोटारसायकलरुन ढकलून दिले, वडिलाविरुध्द गुन्हा दाखल
