लासलगाव – येथील गजबजलेल्या भागात घरफोडीची घटना घडल्याने खळबळ उडाली आहे येथील राम मंदिर ट्रस्टी विष्णू निकम यांच्या घरी हातात धारदार शस्त्र असलेल्या सहा चोरट्यानी जबरी चोरी केल्याची घटना शुक्रवारी पहाटे घडली. या चोरीमुळे लासलगांव शहरासह परिसरात भीतीचे वातवरण निर्माण झाले आहे. चोरी करण्यासाठी येत असताना धारदार शस्त्र हातात असलेले अज्ञात चोरटे जवळच असलेल्या सीसीटीव्ही कॅमेऱ्यात कैद झाले आहे.या चोरट्यांनी १५८ ग्रॅम सोन्याची दागिने तसेच अंदाजे ३ लाख रुपये रोख रुक्कम लंपास केली आहे.
याबाबत लासलगाव पोलिसांनी दिलेली माहिती अशी की, लासलगाव येथील अहिल्याबाई होळकर किल्याच्या पाठीमागील भागात पहाटे सव्वादोन वाजेच्या दरम्यान अज्ञात सहा चोरट्यांनी चोरीच्या उदेशाने येथील सर्व घरांची पाहणी केली. त्यानंतर येथील राम मंदिर ट्रस्टी विष्णू निकम यांच्या घरी घरफोडी केल्याची घटना घडली आहे. विष्णू निकम आणि मुलगा संदीप आपल्या पत्नी समवेत वेगवेगळ्या रुममध्ये झोपले असताना अज्ञात धारदार शस्त्र असलेले सहा चोरट्यांनी जळीचे गेट वाकवून घराचा कडीकोंडा कापून घरात प्रवेश केला. हॉलमधील शोकेस व बाजूचे लाकडी कपात मधील कपे तोडून त्यातील १५८ ग्रॅम वजन असलेले सोन्याची दागिने तसेच पोस्टाचे आरडी कलेक्शनची रक्कम व स्वताचे असे अंदाजे ३ लाख रुपये रोख रुक्कम असा एकूण ४ लाख ५८ हजार रूपयांचा मुद्देमाल चोरुन नेत पोबारा केला. पहाटे विष्णू निकम उठले असतात एवढ्या पहाटे घराचे दार कोणी उघडले म्हणून पाहणी करण्यासाठी खाली आले असतात आपल्या घरात चोरी झाल्याचे समजताच आरडाओरडा केला. त्यावेळेस मुलगा संदीप उठला तसेच शेजारील धावपळ करत आले असतात जबरी चोरी झाल्याचे समजले. या चोरीची माहिती लासलगाव पोलिसांना समजताच निफाडचे पोलीस उपअधीक्षक सोमनाथ तांबे ,सहाय्यक पोलीस निरीक्षक राहुल वाघ ,पोलीस उपनिरीक्षक रामकृष्ण सोनवणे व कर्मचारी घटनास्थळी दाखल झाले. त्यानंतर त्यांनी वरिष्ठांना माहिती दिली श्वानपथक व ठसे तज्ञांना प्राचाराण करण्यात आले. या चोरीची माहिती गावात वा-यासारखी पसरताच बघ्यांनी मोठी गर्दी केली. मात्र यावेळी बघ्यांना कोरोनाचा प्रादुर्भाव सुरु असून आपण सोशल डिस्टेंसिंगचा फज्जा उडवत विना मास्क असल्याचे विसर पडल्याचे चित्र पाहवयास मिळाले. हे अज्ञात सहा चोर चोरी करण्यासाठी घराची पाहणी करत होते. त्यावेळी जवळच असलेल्या एका सीसीटीव्ही कॅमेऱ्यात अज्ञात धारदार शस्त्र असलेले सहा चोरटे कैद झाले. या चोरीप्रकरणी लासलगाव पोलीस ठाण्यात गुन्हा दाखल झाला असून पोलिसांनी सीसीटीव्ही कॅमेऱ्याच्या मदतीने तपास सुरु केला आहे. या सीसीटीव्ही कॅमेऱ्यात दिसत असलेले हे चोरटे दिसल्यास लासलगाव पोलिसांशी संपर्क करण्याचे आवाहन लासलगाव पोलिसांनी केले.
