लासलगाव -लाॅकडाऊनमध्येही कामाशिवाय विनाकारण मजेने फिरणारे व सबळ कारण न देणारे पंचवीस जणांची आज लासलगावी वाहनचालकांची रॅपीड अॅन्टीजेन टेस्ट भर चौकात आरोग्य विभाग व लासलगाव पोलिसांच्या वतीने बुधवारी करण्यात आली अशी माहीती सहाय्यक पोलिस निरीक्षक राहुल वाघ यांनी दिली.या सर्वांवर संचारबंदी भंग केल्याप्रकरणी गुन्हा दाखल करण्यात आला.
१२ मे ते २२ मे पर्यंत नाशिक जिल्ह्यात कडक जनता कर्फ्यू लागू करण्यात आलेला आहे. त्यामुळे कोरोना बाधित रुग्णांचा आकडा कुठेतरी कमी होत असताना आज रॅपीड अॅन्टीजेन टेस्ट भर चौकात आरोग्य विभाग व लासलगाव पोलिसांच्या वतीने बुधवारी करण्यात आली. नाशिक जिल्ह्यात जिल्हाधिकारी सुरज मांढरे यांच्या आदेशान्वये अत्यंत कडक जनता कर्फ्यू लागू करण्यात आलेला आहे. फक्त अत्यावश्यक सेवा वगळता इतर सर्व व्यवसाय पूर्णपणे बंद ठेवण्याचे आदेश आहेत अशा परिस्थितीत अनेक वाहनचालक व नागरिक विनाकारण रस्त्यांवर फिरत आहेत. त्यामुळे कुठेतरी स्थिर झालेला कोरोना बाधित रुग्ण संख्येचा आकडा वाढण्याची भीती आहे.
लासलगाव पोलीस कार्यालय व आरोग्य विभाग यांच्या वतीने लासलगाव येथील कोटमगाव रोड चौफुली येथे बुधवारी सकाळपासूनच विनाकारण फिरणाऱ्या नागरिकांना अडवून त्यांची रॅपिड टेस्ट करण्यात येत होती. ज्या वाहनचालकांची टेस्ट निगेटिव्ह आली त्यांच्यावर लासलगाव पोलीस कार्यालयात संचार बंदी भंग कायद्यान्वये गुन्हा दाखल करण्यात येत होता. सुमारे २५ वाहन चालकांची यावेळी टेस्ट करण्यात आली सर्व टेस्ट निगेटिव्ह आल्या. लासलगावचे सहाय्यक पोलीस निरीक्षक राहुल वाघ यांच्यासह पोलीस कर्मचारी व ग्रामीण रुग्णालयाचे कर्मचारी या ठिकाणी उपस्थित होते.
