इंडिया दर्पण ऑनलाईन डेस्क
महाराष्ट्राला हादरुन सोडणा-या कोपर्डी येथील घटनेला आठ वर्ष पूर्ण झाली आहेत. १३ जुलै २०१६ ला अहमदनगर जिल्ह्यातील कोपर्डी गावात एका अल्पवयीन मुलीवर बलात्कार करुन तिची निर्घृण हत्या करण्यात आली होती. या प्रकरणातील आरोपींना २९ नोव्हेंबर २०१७ ला फाशीची शिक्षा सुनावण्यात आली. रविवारी पीडित मुलींच्या बहिणींचे लग्न होते. या लग्नाला मुख्यमंत्री देवेंद्र फडणवीस यांनी हजेरी लावली. आठ वर्षापूर्वी देवेंद्र फडणवीस यांनी पीडित कुटुंबीयांशी संवाद साधला होता. त्यावेळी कुटुंबीयांनी पीडितेच्या बहिणीच्या लग्नाबद्दल चिंता व्यक्त केली. तेव्हाच तिच्या लग्नाची जबाबदारी मी घेतो आणि त्या लग्नालाही मी आवर्जून येईन असा शब्द देवेंद्र फडणवीस यांनी दिला होता. तो शब्द पाळत मुख्यमंत्री देवेंद्र फडणवीस आवर्जुन लग्नाला उपस्थित राहिले. भाजप नेते प्रवीण दरेकर यांनी सोशल मीडियावर याबाबत पोस्ट टाकली आहे.
दरेकर यांनी आपल्या पोस्टमध्ये म्हटले आहे की, शब्दांचे पक्के… असे आहेत आमचे नेते मा. मुख्यमंत्री श्री. Devendra Fadnavis जी !
कोपर्डीत ८ वर्षांपूर्वी एक दुर्दैवी घटना घडली होती. राज्याचे मा. मुख्यमंत्री देवेंद्रजी फडणवीस यांनी त्यावेळी मुख्यमंत्री म्हणून पीडित कुटुंबीयांशी संवाद साधला होता. कुटुंबीयांनी पीडितेच्या बहिणीच्या लग्नाबद्दल चिंता व्यक्त केली. तेव्हाच तिच्या लग्नाची जबाबदारी मी घेतो आणि त्या लग्नालाही मी आवर्जून येईन, असा शब्द दिला होता. आज तो दिवस उगवला आणि आमचे नेते देवेंद्रजी फडणवीस यांनी त्या लग्नसोहळ्याला हजेरी लावत आपला शब्द पाळला. वधू-वराला भरभरून आशिर्वाद दिले. नेता असावा तर असा, दिलेला शब्द पाळणारा! या लग्नात मंगलाष्टक म्हणण्याची संधी मला लाभली, कुटुंबीयांनी ती संधी मला दिली, त्याबद्दल मी मनापासून त्यांचा आभारी आहे. सुजय विखे पाटील, राम शिंदे हे सुद्धा यावेळी उपस्थित होते.
https://twitter.com/mipravindarekar/status/1865753499323052186
