इंडिया दर्पण ऑनलाईन डेस्क
कोल्हापूर जिल्ह्यातील कागल येथे शरद पवार यांच्या प्रमुख उपस्थितीत राजे समरजितसिंह घाटगे यांचा पक्षप्रेवश सोहळा संपन्न झाला. हा प्रवेश सोहळा म्हणजे पवारांच्या या डावाने दोन्ही उपमुख्यमंत्र्यांना दिलेला मोठा धक्का समजला जातो. घाटगे हे उपमुख्यमंत्री देवेंद्र फडणवीस यांचे निकटर्वीय मानले जाणारे होते. त्यांना भाजपला सोडचिठ्ठी द्यावी लागली. तर उपमुख्यमंत्री अजित पवार यांचे समर्थक मंत्री हसन मुश्रीफ यांच्या विरोधाक कागल विधानसभा मतदार संघातून शरद पवार यांनी आजच घाटगे यांची उमेदवारी जाहीर केली.
या सोहळ्यात प्रदेशाध्यक्ष जयंत पाटील यांनी सांगितले की, चांगल्या गोष्टी घडत नसतात त्या घडवाव्या लागतात. राजे समरजितसिंह घाटगे यांनी योग्य वेळी योग्य निर्णय घेतला त्यांचे स्वागत करण्यासाठी आम्ही आवर्जून उपस्थित राहिलो. शरद पवार आज स्वतः उपस्थित आहेत हा संदेश कागल विधानसभेला पुरेसा आहे. लोकसभेत ज्यांनी तुतारी हाती घेतली त्या सर्वांचा मोठ्या मताधिक्याने विजय झाला आहे. कागलच्या इतिहासाची नव्याने सुरुवात होत आहे.
शरद पवार साहेब हे कसे जमवतात या विचाराने आमचे विरोधक बुचकळ्यात पडले असतील. पवार साहेब वस्तादांचे वस्ताद आहेत. शेवटचा एक डाव त्यांनी राखू ठेवलेला असतो. बरेच लोकं पक्ष सोडून गेले. पण लक्षात ठेवा “जहां पे हम खडे होते हैं, लाईन वहि से शुरू होती हैं.” मी आधीही सांगत होतो पवार साहेबांच्या वाट्याला जाऊ नका, कपाळ मोक्ष ठरलेलं आहे. कायदा हा सर्वश्रेष्ठ आहे. त्यामुळे सत्ताधारी पक्षात जाऊन फक्त काही काळापुरते संरक्षण मिळते.
राजे समरजितसिंह यांनी गेली १० वर्षे अविरतपणे कार्य केले. कारखाना अतिशय आदर्शपणे चावलेला आहे. सत्ता असो वा नसो कार्यरत राहण्याचा बाणा त्यांनी स्वाभिमानाने जपला आहे. ते व्यवसायाने सीए आहेत. विरोधकांची वजाबाकी त्यांना व्यवस्थितपणे करता येते. हिशोब चोख ठेवणारे राजे समरजितसिंह मतदारसंघात विकास घडवतील हा मला विश्वास आहे.
ही छ्त्रपती शाहू महाराजांची भूमी आहे. या भूमीने सदैव समतेचा पुरस्कार केला. दुर्दैवाने या भूमीतील काही लोकं धर्मांध शक्तीच्या बाजूला जाऊन बसली आहे. छत्रपती शिवाजी महाराज यांचा पुतळा कोसळला. इतके सुमार काम करणारा शिल्पकार अद्याप फरार आहे. तो नक्की कोणाचा मित्र आहे? भ्रष्टचाराने परिसीमा गाठली आहे.
छ्त्रपती शिवाजी महाराज यांनी सुरत लुटले नाही असा कांगावा करत आहेत. कारण गुजरातचे नाव काढले की सत्ताधारी घाबरत आहेत. त्यामुळेच महराजांचा इतिहास बदलण्याचे पाप करत आहेत.
बहुजन समजाच्या विचारांचे राज्य येण्यासाठी पवार साहेब पायाला भिंगरी लावून महाराष्ट्रभर फिरत आहे. आपला पक्ष राजे समरजितसिंह घाटगे यांच्या पाठीशी पूर्ण ताकदीने उभा आहे. त्यांना तुम्हा सर्वांची साथ हवी आहे.
