कोल्हापूर (इंडिया दर्पण वृत्तसेवा) – कोल्हापूरमध्ये धावत्या एसटी बसमध्ये सासू-सासऱ्याने जावयाचा गळा दाबून खून केल्याची धक्कादायक घटना घडली आहे. या हत्येमागील कारणही समोर आले आहे. मुलीला आणि नातवाला दारु पिऊन जावई त्रास देत असल्यामुळे ही हत्या करण्यात आली.
या घटनेमुळे कोल्हापूरमध्ये खळबळ उडाली आहे. विशेष म्हणजे हत्येनंतर सासू-सासऱ्याने जावयाचा मृतदेह हा कोल्हापूरच्या बस स्टँडवर नेऊन ठेवला.
या घटनेबाबत मिळालेली माहिती अशी की, गडहिंग्लजवरुन कोल्हापूरला येणाऱ्या विनावाहक गाडीत ही हत्या करण्यात आली. संदीप शिरगावे असे खून करण्यात आलेल्या जावयाचे नाव आहे. या घटनेनंतर पोलिसांनी सासू-सासर्‍याला ताब्यात घेतले आहे.
मुलीला त्रास देतो म्हणून सासु सास-याने हे टोकाचं पाऊल उचललं असलं तरी ते धक्कादायक आहे. या घटनेत बस प्रवासात नेमकं काय घडलं इतर प्रवासी होते का? या सर्व गोष्टीची तपास आता पोलिस घेत आहे.
