छोट्या पडद्यावरील लोकप्रिय गेम शो म्हणजे कौन बनेगा करोडपती. यातून केवळ मनोरंजनच होत नाही तर बऱ्याच प्रकारची माहितीही मिळते. आणि या सर्वांवर कळस म्हणजे या कार्यक्रमाचे सूत्रसंचालक. अर्थात बिग बी अमिताभ बच्चन, हे कोणीही मान्य करेल. ही एवढी प्रस्तावना करण्याचे कारण म्हणजे, पुन्हा एकदा छोट्या पडद्यावर अमिताभ बच्चन यांचा दमदार आवाज घुमणार आहे. केबीसीचा तेरावा सीझन १० मे पासून सोनी टीव्हीवर सुरू होणार आहे.
तुम्हाला जर या कार्यक्रमात सहभागी व्हायचे असेल तर ही बातमी तुमच्यासाठी आहे. या शो साठी नोंदणीची प्रक्रिया पुढील आठवड्यापासून सुरू होणार आहे. सोनी टीव्हीने आपल्या इन्स्टाग्राम अकाऊंटवरून एका प्रोमोच्या सहाय्याने याबाबतची घोषणा केली आहे. या प्रोमोत अमिताभ बच्चन म्हणतात, ‘‘देवीयों और सज्जनों, कमर कस लीजिए, क्योंकी १० मई से शुरू हो रहे है मेरे सवाल और केबीसीका रजिस्ट्रेशन.’’ सोमवार, १० मे रोजी रात्री ९ वाजल्यापासून अमिताभ बच्चन यांच्या प्रश्नांना सुरुवात होणार आहे.
संग्रहित फोटो
या कार्यक्रमात एसएमएस किंवा सोनी लिव्ह ऍपच्या माध्यमातूनच सहभागी होता येणार आहे. हे संपूर्णपणे मोफत आहे. स्पर्धकाने योग्य माध्यमातून दिलेले पहिले उत्तरच ग्राह्य धरण्यात येईल. गेल्या वर्षी या कार्यक्रमाचे रजिस्ट्रेशन लॉकडाऊनच्याच दरम्यान झाले होते. आणि अमिताभ बच्चन यांनी घरीच व्हिडीओ शूट केला होता.
केबीसीला २००० मध्ये सुरुवात झाली. तेव्हा पुरस्काराची किंमत १ कोटी एवढी होती. दुसऱ्या आणि तिसऱ्या सीझनमध्ये ही रक्कम दुप्पट झाली. तर चौथ्या सीझनमध्ये पुन्हा ती एक कोटी झाली. आणि ५ कोटींसाठी जॅकपॉट प्रश्न विचारला जाऊ लागला. सातव्या सीझनमध्ये प्रश्नांची संख्या १३ वरून १५ झाली आणि बक्षिसाची रक्कम झाली ७ कोटी. नवव्या सीझनमध्ये प्रश्नांची संख्या १६ झाली तर बक्षिसाची रक्कम तेवढीच राहिली. केबीसीचे आतापर्यंतचे सगळे शो अमिताभ बच्चन यांनीच होस्ट केले आहेत. तर सीझन ३ हा शाहरुखने होस्ट केला आहे. या कार्यक्रमात अनेक सेलिब्रिटी देखील सहभाग होतात.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
