कर्नाटकात भाजपला मोठा धक्का! माजी मुख्यमंत्र्यांनी ठोकला रामराम; २०-२५ जागांवर फटका बसणार?

इंडिया दर्पण ऑनलाईन डेस्क – कर्नाटकचे माजी मुख्यमंत्री जगदीश शेट्टर यांनी भाजपच्या प्राथमिक सदस्यत्वाचा राजीनामा दिला आहे. यासोबतच शेट्टार यांनी भाजपच्या आमदारकीचाही राजीनामा दिला आहे. भविष्यातील योजना लवकरच जाहीर करणार असल्याचे जगदीश शेट्टर यांनी सांगितले आहे. ते अपक्ष म्हणून निवडणूक लढवणार की कोणत्याही पक्षाकडून हे लवकरच ठरवणार आहेत. जगदीश शेट्टर हे हुबळी मध्य मतदारसंघातून अनेकदा आमदार राहिले आहेत. मात्र, यावेळी त्यांना तिकीट न दिल्याने ते नाराज झाले. त्यामुळे त्यांनी थेट भाजपला रामराम केला आहे.

जगदीश शेट्टर यांनी पक्ष सोडल्याबद्दल भाजपने म्हटले आहे की शेट्टर यांनी पक्षापेक्षा स्वतःला प्राधान्य दिले आहे. भाजप हायकमांड सातत्याने त्यांच्याशी बोलून प्रकरण मिटवण्याचा प्रयत्न करत होते मात्र शेट्टर यांनी पक्षापेक्षा स्वतःला महत्त्व दिले. शेट्टर हे लिंगायत नेते असून कर्नाटकच्या राजकारणात लिंगायतांचा मोठा प्रभाव आहे.

माजी मुख्यमंत्री बीएस येडियुरप्पा म्हणाले होते की शेट्टर यांना तिकीट न मिळाल्यास त्याचा एका ठिकाणी परिणाम होणार नाही तर उत्तर कर्नाटकातील २०-२५ विधानसभा जागांवर परिणाम होऊ शकतो. भाजप सोडण्यापूर्वी जगदीश शेट्टर यांनी दिल्लीत भाजप अध्यक्ष जेपी नड्डा यांचीही भेट घेतली होती. मात्र, या बैठकीतही काही निष्पन्न झाले नाही. अखेर आणि शेट्टर यांनी पक्ष सोडला आहे.

जगदीश शेट्टर यांनी भाजप सोडल्याबद्दल माजी मुख्यमंत्री बीएस येडियुरप्पा म्हणाले की, कर्नाटकची जनता जगदीश शेट्टर यांना माफ करणार नाही. धर्मेंद्र प्रधान यांनी जगदीश शेट्टर यांना मंत्रिमंडळात मंत्री करण्याची ऑफर दिली होती. तसेच जगदीश शेट्टर यांच्या कुटुंबीयांनाही तिकीट देऊ करण्यात आले मात्र त्यांनी प्रतिसाद दिला नाही. आम्ही त्यांना मुख्यमंत्री, भाजपचे प्रदेशाध्यक्ष केले. त्यांनी दिलेल्या वक्तव्याचा आम्हाला राग आहे. जगदीश शेट्टर यांना जनता भाजपमुळेच ओळखते, असे येडीयुरप्पा म्हणाले.

उपमुख्यमंत्र्यांसह ६ आमदारांचाही रामराम
शेट्टर यांच्याशिवाय भाजप सरकारमधील माजी उपमुख्यमंत्री लक्ष्मण सवदी यांनीही पक्षाचा राजीनामा दिला आहे. लक्ष्मण सवदी यांनी काँग्रेसमध्ये प्रवेश केला असून ते आता काँग्रेसच्या तिकिटावर निवडणूक लढवत आहेत. कर्नाटक सरकारचे मंत्री आणि सहा वेळा आमदार एस अंगारा, मुदिगेरेचे आमदार खासदार कुमारस्वामी, हवेरीचे आमदार नेहरू ओलेकर, होसदुर्गाचे आमदार गोलिहट्टी शेखर, कुडलिगीचे आमदार एनवाय गोपालकृष्ण, आमदार आर शंकर यांनीही भाजपला सोडचिठ्ठी दिली आहे.

Karnataka Election Politics BJP EX CM Jagdish Shettar Resign