ठाणे (इंडिया दर्पण वृत्तसेवा) – मुंबईसह परिसरामध्ये मुसळधार पाऊस सुरू आहेत. त्यात काही दुर्घटनाही घडत आहेत. ठाकुर्लीजवळ एक दुर्घटना घडली जी देशभरातच चर्चेत आहे. भर पावसात रेल्वे रूळावरून जाताना अवघ्या चार महिन्यांचे बाळ आजोबांच्या हातून निसटले आणि नाल्यात पडले. या घटनेने सर्वांचे हृदय हेलावले. याबद्दल सर्वस्तरातून हळहळ व्यक्त होत आहे, परंतु ही घटना नेमकी कशी घडली याची हृदयद्रावक कहाणी त्या आजोबांनीच कथन केली आहे. हे ऐकून तुमच्याही अंगावर शहारे येतील…
रेनकोट, नाला आणि पाऊस…
या हृदयद्रावक घटनेबद्दल मिळालेल्या माहितीनुसार, योगिता शंकर रुमाल या बाळंतपणासाठी हैदराबाद येथून आपल्या माहेरी भिवंडीत आल्या होत्या. त्यांच्या रिषिका रुमाल (४ महिने) या बालिकेवर मुंबईतील वाडिया रुग्णालयात उपचार सुरू होते. तिच्या नियमित तपासणीसाठी योगिता आपले वडील ज्ञानेश्वर पोंगुल यांच्या सोबत मुंबईला गेली होती. जाताना ते गाडीने गेले होते, स्टेशनवर दुपारी गर्दी नसल्याने मुंबईहून अंबरनाथ लोकलने ठाकुर्लीपर्यंत आले. कल्याण स्थानकात उतरून त्यांना भिवंडीला जायचे होते. मात्र, मुसळधार पावसाने रेल्वे सेवा बंद झाल्याने योगिता, वडील ज्ञानेश्वर हे चिमुकल्या रिषिकाला घेऊन रेल्वेमार्गातून चालत निघाले होते. परत येताना पावसाने रेल्वेसेवेला फटका बसल्याने त्यांनी रेल्वे मार्गावर उतरून असा प्रवास सुरू केला होता. पावसापासून नातीचे संरक्षण व्हावे म्हणून आजोबांनी तिला रेनकोटमध्ये घेतले होते. मात्र, अचानक त्यातून ती निसटली आणि नाल्यात पडली.
शोध सुरूच
मुसळधार पावसात चालत असताना रेनकोट मध्ये बाळ झाकलेले होते. परंतु चालण्याच्या नादात रेल्वे रुळावरून जाताना नेमकी दुर्घटना घडली. याबाबत ज्ञानेश्वर पोंगुल यांनी त्या दिवशी नेमके काय घडले? याची आपबिती कहाणी सांगितली, दोन-तीन तास लोकल रेल्वे ट्रॅकवर थांबली होती. सर्वजण खाली उतरून जात होते. आम्ही पण लोकलमधून खाली उतरून जाण्याचे ठरवले. ट्रॅकवर चालत असताना माध्येच माझ्या मुलीचा पाय घसरला आणि त्यानंतर मी तिला सावरले. माझ्या नातीला मी रेनकोटमध्ये गुंडाळून माझ्या हातात घेतले होते. मात्र माझाही पाय घसरला आणि माझ्या हातात असलेली माझी नात रेनकोटमधून कधी नाल्यात पडली. मला समजलेच नाही. बाळ रेनकोटमध्ये नसल्याचे आमच्या लक्षात आले. मात्र तोपर्यंत माझी नात नाल्यात वाहून गेली होती, असे ज्ञानेश्वर यांनी सांगितले. सुमारे चार महिन्यांची ही बालिका असून तिचे नाव रिषिका ठेवण्यात आले होते. ठाकुर्ली कल्याण मार्गावर रुळाखालील नाल्यात पडून रिषिका या लहान बाळाचा शोध तिसऱ्या दिवशीही तपास यंत्रणेला लागला नाही. एनडीआरएफने तपास थांबवला होता. स्थानिक अग्निशमन यंत्रणा आणि लोहमार्ग पोलिसांनी मात्र तिचा शोध सुरूच ठेवला आहे. मात्र या प्रकरणांनी सर्वत्र हळहळ व्यक्त होत आहे.
