नाशिक (इंडिया दर्पण वृत्तसेवा)- राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांच्या पुढाकारातून येवला-लासलगाव परिसरातील तरुणांसाठी जिल्हा कौशल्य विकास, रोजगार व उद्योजकता मार्गदर्शन केंद्र, नाशिक यांच्या वतीने रविवार १८ ऑगस्ट २०२४ रोजी पंडित दिनदयाळ उपाध्याय रोजगार मेळाव्याचे आयोजन करण्यात आले आहे. १८ ऑगस्ट रोजी सकाळी १० ते ४ या वेळत माऊली लॉन्स, विंचूर रोड, येवला येथे हा रोजगार मेळावा होणार आहे. या रोजगार मेळाव्याचे उदघाटन राज्याचे अन्न,नागरी पुरवठा व ग्राहक संरक्षण मंत्री छगन भुजबळ यांच्या हस्ते होणार आहे. या रोजगार मेळाव्यात जास्तीत जास्त युवकांनी सहभागी होऊन रोजगाराच्या संधी उपलब्ध करून घ्याव्यात असे मंत्री छगन भुजबळ यांच्या कार्यालयाकडून करण्यात आले आहे.
मंत्री छगन भुजबळ यांच्या पुढाकारातून येवला मतदारसंघातील युवक युवतींसाठी रोजगाराच्या संधी उपलब्ध व्हाव्यात यासाठी आयोजित करण्यात आलेल्या भव्य रोजगार मेळाव्याच्या माध्यमातून २४ नामांकित कंपन्यांमध्ये ३६४८ पदांकरिता भरती होणार आहे. यामध्ये १० वी पास ते पदवीधर, पदव्युत्तर, डिप्लोमा / डिग्री इंजिनिअरिंग, आयटीआय, फार्मसी, इ. सर्व प्रकारच्या शैक्षणिक पात्रताधारक उमेदवारांसाठी नोकरीच्या संधी उपलब्ध करून देण्यात आलेले आहेत.
या रोजगार मेळाव्यामध्ये नामांकित कंपन्यांमध्ये नोकरीच्या हजारो संधी उपलब्ध असणार आहे. कौशल्य विभागाच्या माध्यमातून प्रशिक्षणाची संपूर्ण माहिती सोबत स्टार्टअप व उद्योजकतेसंदर्भात मार्गदर्शन करण्यात येणार आहे. तसेच ज्याना नोकरी न करता व्यवसाय करायचा आहे अशा उमेदवारांना स्वयंरोजगार मार्गदर्शन करण्यासाठी महात्मा फुले मागासवर्ग विकास महामंडळ मर्या,महाराष्ट्र राज्य दिव्यांग वित्त व विकास महामंडळ मर्या., मौलाना आझाद अल्पसंख्यांक आर्थिक विकास महामंडळ, वसंतराव नाईक विमुक्त जाती व भटक्या जमाती विकास महामंडळ मर्या., महाराष्ट्र राज्य इतर मागासवर्गीय वित्त आणि विकास महामंडळ मर्या.,अण्णासाहेब पाटील आर्थिक मागास विकास महामंडळ,संत रोहिदास चर्मोद्योग व चर्मकार विकास महामंडळ, साहित्यरत्न लोकशाहीर अण्णाभाऊ साठे विकास महामंडळ, महाराष्ट्र राज्य खादी व ग्रामोद्योग मंडळाचे स्टॉल याठिकाणी असणार आहे. यातून स्वयंरोजगार मार्गदर्शन, विविध महामंडळाच्या कर्ज योजनांची माहिती देण्यात येणार आहे. या मेळावा प्रसंगी सहभागी झालेल्या उमेदवारांच्या कागदपत्रांची पडताळणी आणि मुलाखती पश्चात उमेदवार पात्र ठरल्यास त्यांना नियुक्तीपत्र देखील देण्यात येणार आहे.
या मेळाव्यात येवला लासलगाव विधानसभा मतदारसंघातील तरुणांनी मोठ्या संख्येने उपस्थित राहून सहभाग नोंदवावा. या मेळाव्यात सहभागी होण्यासाठी नोंदणी करणे आवश्यक आहे. यासाठी सदर https://tinyurl.com/56n7jzxh लिंक वर किंवा क्यूआर कोडवर आपण नोंदणी करू शकता असे आवाहन अ. ला. तडवी, सहायक आयुक्त, कौशल्य विकास,रोजगार व उद्योजकता, नाशिक यांनी केले आहे.
