इंडिया दर्पण ऑनलाईन डेस्क
बीडच्या मस्साजोग सरपंच संतोष देशमुख यांच्या हत्या प्रकरणात राष्ट्रवादी काँग्रेस शरद पवार गटाचे नेते जितेंद्र आव्हाड यांनी संतप्त पोस्ट केली आहे. त्यांनी म्हटले आहे की, वा… वा, सारे चित्र स्पष्ट आहे. तरीही, नरो वा कुंजरो वा… अशीच भूमिका तपास यंत्रणांची आहे असे सांगत एक फोटो पोस्ट केला आहे. त्यात म्हटले आहे की शिवलिंग मोराळे हा MH 23 BG 2231 या गाडीचा मालक. त्याचा हा फोटो ! जेव्हा ही गाडी मोराळेने घेतली तेव्हा त्या गाडीची पुजा करतानाचा हा फोटो आहे. आता ही पुजा कोण करतंय, हे स्पष्ट दिसतच आहे.
आता आपण या फोटोवरून एक एक कडी जोडत जाऊ या… सुरूवातीला उपमुख्यमंत्री अजितदादा पवार यांच्या ताफ्यात MH 23 BG 2231 ही गाडी दिसते. त्यानंतर या गाडीचा मालक शिवलिंग मोराळे अजितदादांपासून जवळचे अंतर राहून उभा राहतो. शेवटी ज्या गाडीतून वाल्मिक कराड हा सीआयडी कार्यालयात शरणागती पत्करतो; ती गाडी देखील MH 23 BG 2231 हीच असते. अन् या गाडीत शिवलिंग मोराळे असतो.
ज्या गाडीची पुजा धनंजय मुंडे करतात; जी गाडी अजितदादांच्या ताफ्यात वापरली जाते अन् ज्या गाडीतून वाल्मिक कराड शरणागतीसाठी येतो, त्या गाडीचा मालक शिवलिंग मोराळे म्हणतो, “वाल्मिकने हात दाखवला म्हणून लिफ्ट दिली”. वा… वा, सारे चित्र स्पष्ट आहे. तरीही, नरो वा कुंजरो वा… अशीच भूमिका तपास यंत्रणांची आहे.
