इंडिया दर्पण ऑनलाईन डेस्क
जिओब्लॅकरॉक अॅसेट मॅनेजमेंट प्रायव्हेट लिमिटेडने म्युच्युअल फंड बाजारात प्रवेश करण्याआधीच आपल्या वरिष्ठ नेतृत्व टीमची घोषणा केली आहे. यासोबतच कंपनीने आपली अधिकृत वेबसाईट आणि एक विशेष ‘अर्ली ऍक्सेस’ उपक्रम देखील सुरू केला आहे. मागील महिन्यातच कंपनीने सिड स्वामीनाथन यांची व्यवस्थापकीय संचालक आणि मुख्य कार्यकारी अधिकारी (CEO) म्हणून नियुक्ती जाहीर केली होती. जिओब्लॅकरॉक हे जिओ फायनान्शियल सर्व्हिसेस लिमिटेड (JFSL) आणि अमेरिका स्थित ब्लॅकरॉक यांचं संयुक्त उपक्रम आहे.
कंपनीने गौरव नागोरी यांची मुख्य परिचालन अधिकारी (COO), अमित भोसले यांची चीफ रिस्क ऑफिसर, अमोल पई यांची चीफ टेक्नोलॉजी ऑफिसर आणि बिराजा त्रिपाठी यांची हेड ऑफ प्रॉडक्ट म्हणून नियुक्ती केली आहे. कंपनीने सांगितले की, जिओब्लॅकरॉक अॅसेट मॅनेजमेंटची टीम गुंतवणूक व्यवस्थापनाचा अनुभव, डिजिटल नवोन्मेष आणि ग्राहक-केंद्री उत्पादने यांचा संगम साधेल. कंपनीची ही अग्रगण्य टीम गुंतवणुकीचे स्वरूप बदलून ते लाखो लोकांसाठी अधिक सुलभ व परवडणारे बनवण्याच्या जिओब्लॅकरॉकच्या मिशनसाठी सज्ज आहे.
जिओब्लॅकरॉक अॅसेट मॅनेजमेंटचे व्यवस्थापकीय संचालक व CEO सिड स्वामीनाथन म्हणाले, “जिओब्लॅकरॉक अॅसेट मॅनेजमेंटसाठी हा एक मैलाचा दगड आहे. आमची नेतृत्व टीम पारदर्शक व स्पर्धात्मक किंमत धोरणावर आधारित उपाययोजना करण्यासाठी कटिबद्ध आहे. येत्या काही महिन्यांत कंपनी विविध गुंतवणूक पर्याय सादर करणार असून, त्यात डेटा-आधारित गुंतवणुकीत ब्लॅकरॉकची कौशल्ये वापरण्यात येणार आहेत.”
जिओब्लॅकरॉक अॅसेट मॅनेजमेंटने आपल्या वेबसाईटवर एक ‘एक्सक्लुझिव्ह अर्ली ऍक्सेस’ उपक्रम देखील जाहीर केला आहे. या उपक्रमाअंतर्गत, लोकांना जिओब्लॅकरॉक अॅसेट मॅनेजमेंटच्या डिजिटल-प्रथम गुंतवणूक सेवांमध्ये स्वारस्य दाखवण्यासाठी आमंत्रित करण्यात आले आहे. नोंदणी केल्यानंतर, त्यांना गुंतवणुकीच्या मूलतत्त्वांवर आधारित माहिती व शैक्षणिक सामग्री प्राप्त होईल.
याची नोंद घ्यावी की, २६ मे २०२५ रोजी जिओब्लॅकरॉक अॅसेट मॅनेजमेंट प्रायव्हेट लिमिटेडला आपला म्युच्युअल फंड व्यवसाय सुरू करण्यासाठी भारतीय सिक्युरिटीज अँड एक्सचेंज बोर्ड (SEBI) कडून मान्यता प्राप्त झाली आहे
