खडसे-महाजनांमुळे राज्यभर गाजत असलेल्या जळगाव जिल्हा दूध संघासाठी मतदान सुरू; दीड लाख फुलीची जोरदार चर्चा

विजय वाघमारे, जळगाव
राष्ट्रवादी काँग्रेसचे नेते एकनाथ खडसे विरुद्ध भाजपचे नेते व क्रीडा मंत्री गिरीश महाजन यांची प्रतिष्ठा पणाला लागलेल्या जळगाव – जिल्हा दूध संघाच्या २० जागांसाठी आज मतदान होत आहे. मतदानाला आज सकाळी आठ वाजेपासूनच सुरुवात झाली आहे. महाजन-खडसे यांच्या आरोप-प्रत्यारोपांमुळे राज्यभरात गाजत असलेल्या या निवडणुकीत दोघांपैकी कोण बाजी मारणार याकडे सगळ्यांचे लक्ष लागले आहे. मात्र, या निवडणुकीत सध्या दीड लाख फुलींची जोरदार चर्चा सुरू आहे.

जळगाव, भुसावळ, अमळनेर, चाळीसगाव, एरंडोल, फैजपूर, पाचोरा ७ तालुक्यात आज मतदान प्रक्रिया पार पडत आहे. या निवडणुकीला ४४१ जण मतदान करणार आहेत. भुसावळ मतदान केंद्रावर राष्ट्रवादीचे नेते एकनाथराव खडसे यांच्या पत्नी मंदाकिनी खडसे, भाजपचे आमदार संजय सावकारे यांनी मतदानाचा हक्क बजावला. भुसावळमध्ये एक मतदान केंद्र लावण्यात आले असून या केंद्रावर ४४ जण मतदान करणार आहेत.

जळगाव दूध संघ निवडणूकीत मंत्री गुलाबराव पाटील यांच्या विरोधात जळगावच्या महापौर जयश्री महाजन यांच्या सासू मालती महाजन या जळगाव तालुक्यातून उमेदवार आहेत. जळगाव शहरातील सत्य वॉलभ मतदान केंद्रावर महापौर जयश्री महाजन यांनी आणि त्यांच्या सासू मालती महाजन यांनी मतदान करून मतदानाचा पहिला हक्क बजावला. दूध संघावर ताबा मिळवण्यासाठी एकनाथराव खडसे आणि गिरीश महाजन यांच्यात चुरस पहायला मिळतेय. एकनाथराव खडसे या निवडणुकीत एकटे पडल्याचं चित्र आहे. कारण मंत्री गुलाबराव पाटील यांच्यासह सात आमदार खडसे यांच्याविरोधात आहेत. जळगाव जिल्ह्यातील सहकार क्षेत्रातील राजकारण पाहता, शिंदे-भाजप गटासाठीदेखील ही लढाई सोपी नाही. त्यामुळे या राजकीय आखाड्यात कोण विजयी ठरणार, याकडे सगळ्यांचं लक्ष लागलं आहे.

जाणून घ्या…किती ‘फुली’ चालल्याची सुरु आहे चर्चा!
अवघं ४४१ मतदान असल्यामुळे दुध संघाची निवडणूक प्रचंड चुरशीची झाली आहे. सूत्रांनी दिलेल्या माहिती नुसार दोन्ही गटाकडून ५०-५० हजारांचे टोकन देण्यात आले होते. त्यानंतर गुरुवारी सायंकाळपर्यंत पुन्हा एक-एक लाख देण्यात आले. त्यानुसार एका फुलीचा रेट हा दीड लाख रुपये होता. परंतु सूत्रांनी दिलेल्या माहिती नुसार शुक्रवारी रात्री पुन्हा ५०-५० हजार देण्यात आले. त्यानुसार आतापर्यंत दोन-दोन लाख फुली देण्यात आल्याची चर्चा आहे. पण एका गटाने ५० हजार रुपये आणखी अतिरिक्त देण्याची तयारी दर्शवली आहे.

Eknath Khadse Girish Mahajan Politics Jalgaon District Milk Society