दर शनिवारी मारुतीच्या दर्शनाला जायचे… रस्ते अपघातात चुलतभावांचा मृत्यू… जळगाव जिल्ह्यातील दुर्दैवी घटना…

जळगाव (इंडिया दर्पण वृत्तसेवा) – जिल्ह्यातील शिरसाळा मारुती मंदिरात दर्शनासाठी जाणाऱ्या दोघांचा रस्ते अपघातात मृत्यू झाला आहे. भरधाव ट्रकने दुचाकीस जबर धडक दिल्याने हा अपघात झाला आहे. बोहर्डीजवळील बाबा ढाब्यासमोर हा अपघात झाला. याप्रकरणी अज्ञात ट्रक चालकावर गुन्हा दाखल करण्यात आला आहे. भास्कर कुंभार व लखन कुंभार (रा. सावदा) अशी मृतांची नावे आहेत. ते चुलत भाऊ आहेत.

रावेर तालुक्यातील सावदा येथील चार मित्र नित्यनियमाने शनिवारी शिरसाळा मारोती दर्शन जात होते. त्यात भूषण किशोर पुर्भी (रा.चांदणी चौक, सावदा), भूषण चंद्रकांत कुंभार, भास्कर पांडुरंग कुंभार, लखन पंकज कुंभार तीथे (रा. इंदिरा गांधी चौक, सावदा) या चार मित्रांचा समावेश आहे. हे चारही मित्र सकाळी पाच वाजता शिरसाळा ता. बोदवड येथे निघाले. सकाळी ६.१५ च्या सुमारास महामार्गावरील बोहर्डी (ता. भुसावळ) येथे वाचा ढाच्यासमोर आले. त्याचवेळी मोटरसायकल (होंडा ड्रीम युगा क्रमांक एम एच १९. डी एम ८७८९) यावरील चालक भास्कर पांडुरंग कुंभार व त्याच्या पाठीमागे बसलेला लखन पंकज कुंभार यांना अज्ञात ट्रकने मागून धडक दिली. ही ट्रक भरधाव वेगाने मुक्ताईनगर कडे गेली. या अपघातावेळी मोठा आवाज झाला. त्यामुळे दुसऱ्या दुचाकीवरील भूषण पूर्वे आणि भूषण चंद्रकात कुंभार यांनी मागे वळून पाहिले. आपल्या मित्रांचा अपघात झाल्याचे त्यांच्या निदर्शनास आले. त्यांनी तत्काळ अपघातस्थळी धाव घेतली. भास्कर कुंभार यास जबर मार लागला होता तर लखन याच्या पायाला व छातीला दुखापत झाली. यावेळी बोहडी ग्रामस्थांनीही मदतकार्यासाठी धाव घेतली.

दोघे जखमींना रिक्षातून वरणगाव ग्रामीण रुग्णालयात दाखल करण्यात आले. मात्र, भास्कर कुंभार याचा मृत्यू झाल्याचे वैद्यकिय अधिकारी डॉ. क्षितीजा हेडवे यांनी सांगितले. तर, लखन कुंभार यास तात्काळ भुसावळ रिंदम हॉस्पिटल येथे हलविण्यात आले. मात्र, उपचार सुरू असतानाच लखनचाही मृत्यू झाला. याप्रकरणी भूषण पूर्भी याच्या तक्रारीवरुन अज्ञात ट्रक चालकाविरुद्ध गुन्ह्याची नोंद करण्यात आली आहे. पुढील तपास सहाय्यक पोलिस निरिक्षक आशिष कुमार आडसूळ यांचे मार्गदर्शनाखाली उप पोलिस निरिक्षक परशुराम दळवी, पोहे का प्रशांत ठाकुर करीत आहे.

सावदा येथे एकाच वेळी अंत्यसंस्कार
बोदवड तालुक्यातील शिरसाळा मारोती मंदिर जागृतस्थान असून शनिवार या दिवशी जळगाव जिल्ह्यातून भाविक मोठया संख्येने देवदर्शन घेण्यासाठी छोटया मोठया वाहनाने जात असतात. मंदिराच्या परिसरात यात्रेचे स्वरूप येते. शनिवार रोजी सावधाचे चौघे मित्र दोन मोटरसायकलवर शिरसाळा मारोती येथे जात असतांना अज्ञात ट्रकचालकाने त्यांच्या मोटरसायकला धडक दिली. त्यात दोघांचा मृत्यू झाला. दोघांवर एकाच वेळी सावदा स्मशानभूमीत अत्यंस्कार करण्यात आले.

Jalgaon District Road Accident Brother Death
Savda Bodvad Maruti Temple Varangaon Crime Truck Two Wheeler