जळगाव (इंडिया दर्पण वृत्तसेवा) – उपमुख्यमंत्री आणि भाजप नेते देवेंद्र फडणवीस यांच्या जळगाव दौऱ्याचा एक व्हिडिओ सध्या तुफान व्हायरल झाला आहे. एका दिव्यांग तरुणीने आपल्या पायाच्या अंगठ्याने फडणवीस यांच्या कपाळावर टिळा लावला. तसेच, या तरुणीने एका पायानेच ताट उचलून त्याद्वारे फडणवीसांना ओवाळले. कारण, या तरुणीला दोन्ही हात नाहीत. भर कार्यक्रमात स्टेजवर झालेल्या या घटनेी सध्या सर्वत्र चर्चा होत आहे. तसेच, या घटनेचा व्हिडिओ फडणवीस यांनी ट्विटरवर शेअर केला असून तो प्रचंड व्हायरल झाला आहे.
हा व्हिडिओ आतापर्यंत तीन लाखांहून अधिक लोकांनी पाहिला आहे. त्याचबरोबर या व्हिडिओला १२ हजारांहून अधिक लोकांनी लाईक केले आहे. या व्हिडिओवर अनेक युजर्सनी आपल्या प्रतिक्रिया दिल्या आहेत. यावर कमेंट करताना एका युजरने लिहिले आहे की, हा खूप क्यूट व्हिडिओ आहे. दुसर्‍या यूजरने लिहिले आहे – छान व्हिडिओ, बहिणीच्या टॅलेंटला सलाम.
फडणवीस म्हणाले
आजवर कितीतरी माता-भगिनींनी मला ओवाळलं. कपाळावर आशीर्वादाचा गंध लावला. आजही त्याच भावनेनं अंगठा कपाळाला टेकला पण तो पायाचा… हाताचा नव्हे. आयुष्यात असे हे क्षण येतात आणि आतून-बाहेरून मन थरारतं. अंगावर रोमांच उभे राहतात.
डोळ्यांच्या कडा ओलावतात पण क्षणभरच. कारण पायाच्या अंगठ्यानं टिळा लावणाऱ्या, त्याचं पायानं आरतीचं तबक ओवाळणाऱ्या, त्या दिव्यांग भगिनीच्या चेहऱ्यावर हास्य फुललेलं होतं. तिच्या नजरेतली चमक आणि धमक जणू नियतीला आव्हान देत म्हणत होती की “तू काय मला हरवणार? मला कोणाची सहानुभूती नको, दया नको. मी खंबीर आहे.”
ते पाहून मी इतकंच म्हणालो, “ताई, तू लढत राहा. आम्ही सगळे तुझ्या सोबत आहोत.”
या भगिनीकडून ऊर्जा आणि प्रेरणा घेताना कुसुमाग्रज आठवले –
“अनंत अमुची ध्येयासक्ती अनंत अन् आशा किनारा तुला पामराला!”
बघा हा व्हायरल व्हिडिओ
