इंडिया दर्पण ऑनलाईन डेस्क – भारतीय अंतराळ संशोधन संस्था (ISRO) आज मोठा इतिहास रचला आहे. कारण, बहुप्रतिक्षित चांद्रयान-३ या मोहिमेचे आज दुपारी २.३५ वाजता यशस्वी प्रक्षेपण करण्यात आले आहे. या मोहिमेचा पहिला टप्पा यशस्वी झाला आहे. यानाने चंद्राकडे झेप घेतली आहे. हे यान पुढील महिन्याच्या अखेरीस चंद्रावर उतरणार आहे.
चांद्रयान ३चे काऊंटडाऊन संपताच आगीच्या ज्वाळा बाहेर आल्या आणि यानाने अवकाशात उड्डाण केले. त्याचवेळी शास्त्रज्ञांसह देशवासियांनी एकच जल्लोष केला. शिट्ट्या, टाळ्या आणि भारत माता की जय अशा घोषणांनी सर्वत्र आनंद व्यक्त करण्यात आला.
चांद्रयान३ मोहिमेची तारीख यापूर्वी १२ ते १९ जुलै दरम्यान निश्चित करण्यात आली होती. चांद्रयान-३ चा फोकस चंद्राच्या पृष्ठभागावर सुरक्षित लँडिंग करण्यावर आहे. अंतराळ क्षेत्रात भारताचे हे आणखी एक मोठे यश आहे, अशी प्रतिक्रीया इस्रोचे अध्यक्ष एस. सोमनाथ यांनी दिली आहे.
चांद्रयान-२ नंतर हे मिशन चंद्राच्या पृष्ठभागावर सुरक्षित लँडिंगसाठी पाठवले जात आहे. चांद्रयान-२ मोहीम शेवटच्या टप्प्यात अयशस्वी झाली. त्याचा लँडर पृथ्वीच्या पृष्ठभागावर धडकला आणि त्यानंतर त्याचा पृथ्वीच्या नियंत्रण कक्षाशी संपर्क तुटला. तीच अपूर्ण मोहीम पूर्ण करण्यासाठी चांद्रयान-३ पाठवण्यात आले आहे.
इस्रोच्या अधिकार्‍यांच्या मते, चांद्रयान-३ मोहीम चांद्रयान-२ चा पुढचा टप्पा आहे, जो चंद्राच्या पृष्ठभागावर उतरेल आणि चाचण्या घेईल. हे चांद्रयान-२ सारखे दिसेल, ज्यामध्ये ऑर्बिटर, लँडर आणि रोव्हर असेल. चांद्रयान-३ चा फोकस चंद्राच्या पृष्ठभागावर सुरक्षित लँडिंग करण्यावर आहे. अभियानाच्या यशस्वितेसाठी नवीन उपकरणे तयार करण्यात आली आहेत. अल्गोरिदम सुधारले आहेत. चांद्रयान-२ मोहीम चंद्राच्या पृष्ठभागावर उतरण्यात अयशस्वी ठरलेल्या कारणांवर लक्ष केंद्रित करण्यात आले आहे.
यापूर्वी, राष्ट्रीय अंतराळ संस्थेने सांगितले होते की, श्रीहरिकोटा येथील सतीश धवन स्पेस सेंटरमध्ये चांद्रयान-३ असलेली एन्कॅप्स्युलेटेड असेंबली LVM3 सोबत जोडली गेली होती. या मोहिमेमुळे अमेरिका, रशिया आणि चीननंतर चंद्रावर सॉफ्ट लँड करणारा भारत हा जगातील चौथा देश बनणार आहे.
