नवी दिल्ली – उत्तर प्रदेश एटीएसने अलकायदाचे दहशतवादी मॉडेल उघड करून संबंधित दहशतवाद्यांना अटक केल्यानंतर आता सुरक्षा यंत्रणांनी इस्लामिक स्टेटच्या (आयएस) दहशतवादी मॉडेलचा पर्दाफाश केला आहे. गेल्या महिनाभरात जम्मू-काश्मीर, कर्नाटक आणि केरळमध्ये २१ ठिकाणी छापे मारून एकूण १० दहशतवाद्यांना अटक केली आहे. सुरक्षा यंत्रणांकडून अनेक संशयितांची चौकशी सुरू आहे. जवळपास एका वर्षापूर्वी भारतातील सक्रिय आयएस मॉडेलबाबत माहिती मिळाली होती.
असे ट्रेस झाले लोकेशन
सुरक्षा यंत्रणांशी संबंधित एक वरिष्ठ अधिकारी सांगतात, दहशतवादी क्रॉनिकल फाउंडेशनच्या नावाने इन्स्टाग्राम चॅनेलवर मोठ्या प्रमाणात आयएसच्या दुष्प्रचाराचा कंटेंट टाकत होते. या चॅनलचे जगभरात पाच हजार सक्रिय सदस्य आहेत. छद्म नावाच्या सक्रिय सदस्यांची सुरक्षा यंत्रणांनी पडताळणी सुरू केली. कर्नाटकच्या मंगळुरू आणि बेंगळुरूसह जम्मू-काश्मीरच्या श्रीनगर आणि बांदीपुरामध्ये दहशतवाद्यांच्या जागांचा ठावठिकाणा लागला.
एनआयएकडून तपास
हळूहळू या दहशतवाद्यांची ओळख पटविण्यात आली आहे. या वर्षी मार्चमध्ये एनआयएने गुन्हा दाखल करून कारवाई सुरू केली. यातील काही दहशतवाद्यांनी आयएसच्या ताब्यातील सीरिया, इराक आणि अफगाणिस्तानला जाण्याची तयारी सुरू केली होती. काही दहशतवाद्यांनी २०१९ च्या एप्रिलमध्ये इराण मार्गे अफगाणिस्तानला जाण्याचाही प्रयत्न केला आहे.
हल्ला करण्याची तयारी
सूत्रांच्या माहितीनुसार, संबंधित दहशतवादी काश्मीरमध्ये आयएस दहशतवाद्यांचे जाळे तयार करण्यासह हल्ल्यांना मूर्त रूप देण्याच्या तयारीत होते. काश्मीरमध्ये दहशतवाद्यांना मदत करणार्यांना ते पैसेही देत होते. अटक करण्यात आलेला दहशतवादी डॉ. रहिसकडून जप्त डिजिटल डिव्हाइसमध्ये स्फोटके बनविण्याच्या तंत्राची सविस्तर माहिती होती. हिंदुत्वावादी नेत्यांची हत्या करून देशात सांप्रदायिक तणाव निर्माण करून मीडिया हाउसेसवर हल्ला करण्याची योजना आखत होते.
छद्म नावाने ऑनलाइन नियतकालिक
आयएसच्या एका मॉडेलचा सूत्रधार जुफरी जौहर दामुदी आणि त्याचा साथीदार अमीन जुहेबला शुक्रवारी कर्नाटकमधील भटकळ येथून अटक केली. गेल्या वर्षी एप्रिलपासून जुफरी वायस ऑफ हिंद नावाने एक ऑनलाइन नियतकालिक काढत होता. त्यामध्ये आयएसच्या दुष्प्रचारासह भारतीय युवकांसाठी प्रक्षोभक मजकूरही होता.
जुफरीची ओळख अशी पटली
सुरक्षा यंत्रणांपासून लपण्यासाठी जुफरीने अबू हाजीर अल बदरी असे आपले नामकरण केले होते. स्वतःला अफगाणिस्तानातील रहिवासी असल्याचे सांगत होता. परंतु तपासाअंती तो भारतातच सक्रिय असल्याचे सुरक्षा यंत्रणांना माहिती मिळाली. ११ जुलैला अटक करण्यात आलेल्या कासीम खुरासानी ऊर्फ निसार याच्या चौकशीच्या आधारावरून जुफरीची ओळख पटली. जुफरीचा लहान भाऊ अदनान हसन दामुदीला २०१७ मध्ये आयएनएने आयएसशी संबंधित एका प्रकरणात अटक केली होती.
परदेशी संस्थांकडून मिळाली मदत
या मॉडेलच्या सदस्यांची ओळख पटविण्यासह अटक करण्यासाठी परदेशी संस्थांची मदत घेण्यात आली. त्याशिवाय एनआयए, गुप्तचर यंत्रणा आणि स्थानिक पोलिसांनी परस्पर सहकार्य केले. तसेच छोट्या-मोठ्या माहितीचे रिअल टाइमचे आदानप्रदान आणि त्याच्या विश्लेषण करण्यात आले. गेल्या एका महिन्यात आयएसच्या दहशतवाद्यांना अटक करण्यासाठी अनंतनाग, श्रीनगर, बांदीपुरा, मंगळुरू, बंगळुरू आणि भटकळमध्ये एकूण २१ ठिकाणी छापे मारण्यात आले.
