आयपीएल १९ सप्टेंबरपासून ! फायनल दसऱ्याला ?

मुंबई – कोरोना कधी संपुष्टात येणार यापेक्षा आयपीएलचे सामने कधी होणार, याची चिंता करणारा मोठा वर्ग भारतात आहे. कारण कोरोनामुळे घरात बसण्याची वेळ आली असताना विरंगुळ्यासाठी आयपीएल हे एक उत्तम माध्यम ठरणार आहे. अशात दोनवेळा आयपीएलवर गंडांतर आल्यानंतर आता १९ सप्टेंबरपासून श्रीगणेशा होणार असल्याचे स्पष्ट संकेत भारतीय क्रिकेट नियामक मंडळाने (बीसीसीआय) दिले आहेत.

कोरोनाच्या दुसऱ्या लाटेने सुसाट गोलंदाजी केल्यामुळे भारतात सुरू असलेले आयपीएल मध्येच बंद करावे लागले होते. जवळपास ३१ सामने शिल्लक असतानाच खेळाडूंमध्ये कोरोनाचे संक्रमण झाल्यामुळे आयपीएल रिटायर्ड हर्ट झाले होते. त्यानंतर दुबईत सामने खेळवणार असल्याच्या बातम्या आल्या. पण नक्की कधी, याबाबत अनिश्चितता होती. ही अनिश्चितता अद्याप कायम असली तरीही किमान एका वेळापत्रकावर येऊन बीसीसीआय थांबले आहे. १९ सप्टेंबर ते १५ आक्टोबर या कालावधीत दुबई, आबुधाबी आणि शारजा येथे सामने होतील. सुरुवातीला डबल हेडर म्हणजेच एकाच दिवशी दोन सामने खेळविण्याचा मंडळाचा विचार होता. मात्र कडाक्याच्या उन्हात खेळाडूंना घाम फोडणे योग्य नाही, असा विचार करून १० आक्टोबरला होणारा अंतिम सामना १५ आक्टोबरवर ढकलण्यात आला. योगायोगाने भारतीयांसाठी हा दिवस आनंदाचाच आहे. कारण १५ आक्टोबरला दसरा असणार आहे. शिवाय युएईमध्ये १५ आक्टोबर अर्थात शुक्रवार हा दिवस सुटीचा, त्यामुळे प्रत्यक्ष मैदानावर सामना बघणाऱ्यांची संख्याही जास्त असेल.

इंग्लंडनंतर दुबई

त्यावेळी भारतीय संघ इंग्लंडमध्ये कसोटी सामन्यासाठी दौऱ्यावर असणार आहे. शेवटच्या कसोटीचा शेवटचा दिवस १४ सप्टेंबरला असेल. त्यामुळे भारतीय संघ १५ सप्टेंबरला इंग्लंडवरून थेट दुबईत दाखल होईल आणि आपापल्या टीमला जॉईन होईल. तत्पूर्वी, बीसीसीआय अध्यक्ष सौरव गांगुली व त्यांच्या पदाधिकाऱ्यांसह आयपीएलच्या नियोजनासाठी दुबईत मुक्कामी आहेत.