सांगली (इंडिया दर्पण वृत्तसेवा) – जिल्ह्यातील तासगाव येथील डॉ. अंजली पाटील यांच्या हॉस्पिटलमधून रविवारी सकाळी एक दिवसाच्या बाळाचे अपहरण झाल्याची घटना घडली होती. हे बाळ अखेर सापडले आहे. हॉस्पिटलमधील एका नर्सनेच हे बाळ पळवल्याचे निष्पन्न झाले आहे.
तासगाव येथे सिद्धेश्वर मंदिर चौकात डॉ. अंजली पाटील यांचे रुग्णालय आहे. या रुग्णालयात दोनच दिवसापूर्वी आरोपी महिला नर्स म्हणून रुजू झाली होती. रुजू होताना महिलेने आपली सर्व कागदपत्रे एक – दोन दिवसात सादर करते असे डॉक्टरांना सांगितले होते. तसेच आपण जुळेवाडी येथील रहिवासी असून सध्या तासगावात राहत असल्याची खोटी माहितीही दिली होती. डॉक्टरांनी तिच्यावर विश्वास ठेवत तिला कामावर घेतले. याच दवाखान्यात चिंचणी येथील एक महिला प्रसुतीसाठी दाखल झाली होती.
शनिवारी या महिलेची प्रसुती झाली होती. रविवारी सकाळी आरोपी नर्स डिलिव्हरी वॉर्डमध्ये गेली आणि या बाळाला घेऊन हॉस्पिटलच्या बाहेर आली. त्यानंतर बाळाला काखेतील पर्समध्ये टाकून पसार झाली. या घटनेने तासगावसह जिल्हाभरात खळबळ उडाली होती. अपहरणाची ही घटना सर्व हॉस्पिटलमधील सीसीटीव्ही कॅमेऱ्यात कैद झाली होती. सीसीटीव्ही फुटेजच्या आधारे पोलिसांनी आरोपीचा शोध घेत बाळासह आरोपी महिलेला शेणोली स्टेशनवरुन ताब्यात घेतले आहे. एलसीबी, विटा व तासगावच्या पोलिसांनी संयुक्तिकरित्या ही कारवाई करत अवघ्या आठ ते नऊ तासात बाळाचा शोध घेत आरोपीला अटक केले. आरोपी महिलेने हे कृत्य का केले याची पोलिस चौकशी करत आहेत.
तासगाव पोलिसांना या अपहरणाची माहिती देताच त्यांचे पथक तात्काळ दवाखान्यात हजर झाले. रुग्णालयातील स्टाफची चौकशी करत पोलिसांनी तेथील सीसीटीव्ही फुटेज तपासले. सीसीटीव्ही फुटेजवरुन पोलिसांनी आपल्या स्त्रोतांना सक्रिय केले. सदर महिला शेणोली स्टेशनवर असल्याची गोपनीय माहिती या स्त्रोतांद्वारे पोलिसांना मिळाली. त्यानुसार विटा येथील वाहतूक पोलिसांनाही अलर्ट करण्यात आले. पोलीस पथकाने तात्काळ शेणोली स्थानकावर धाव घेत बाळासह महिलेला ताब्यात घेतले. बाळाला आई-वडिलांच्या ताब्यात देण्यात आले असून महिलेला तासगाव पोलीस ठाण्यात आणण्यात आले आहे. पोलिस तिची कसून चौकशी करत आहेत.
Infant Kidnapped by Nurse from Hospital Sangli Crime CCTV Footage
