ब्रिटनमध्ये साकारणार पहिले जगन्नाथ मंदिर… या अब्जाधीशाने दिली तब्बल २५० कोटींची देणगी… आजवरचे सर्वाधिक दान

इंडिया दर्पण ऑनलाईन डेस्क – ब्रिटनमधील पहिले जगन्नाथ मंदिर साकार होणार आहे. या मंदिराच्या बांधकामासाठी भारतीय वंशाच्या अब्जाधीशाने तब्बल २५० कोटी रुपयांची देणगी दिली आहे. ओडिशाचे रहिवासी विश्वनाथ पटनायक यांनी ही रक्कम मंदिराच्या बांधकामावर काम करणाऱ्या ब्रिटीश धर्मादाय संस्थेला देण्याचे सांगितले आहे.

मंदिराचा पहिला टप्पा पुढील वर्षअखेरीस पूर्ण होणे अपेक्षित आहे. परदेशात मंदिरासाठी दिलेले हे सर्वात मोठे योगदान आहे. इंग्लंडमधील धर्मादाय आयोगाकडे नोंदणीकृत श्री जगन्नाथ सोसायटी (एसजेएस) यूकेने सांगितले की, रविवारी अक्षय्य तृतीयेला यूकेमध्ये झालेल्या पहिल्या जगन्नाथ संमेलनादरम्यान ही घोषणा करण्यात आली.

१५ एकर जमीन
ब्रिटनमधील जगन्नाथ मंदिराचे स्वप्न पूर्ण करण्यासाठी एकत्रितपणे काम करण्याचे आवाहन या कार्यक्रमात बोलताना पटनायक यांनी भाविकांना केले. लंडनमधील ‘श्री जगन्नाथ मंदिरा’साठी सुमारे १५ एकर जमीन खरेदी करण्यासाठी २५० कोटी रुपयांपैकी ७० कोटी रुपयांची तरतूद करण्यात आली आहे.

मंदिरासाठी अर्ज
“जमिनीचा एक योग्य तुकडा ओळखण्यात आला आहे आणि सध्या खरेदीच्या अंतिम टप्प्यात आहे आणि मंदिर बांधण्यासाठी परवानगी मिळविण्यासाठी स्थानिक सरकारी कौन्सिलकडे पूर्व नियोजन अर्ज सादर केला आहे,” असे धर्मादाय संस्थेने एका निवेदनात म्हटले आहे. मंदिराचे अध्यक्ष डॉ. सहदेव स्वेन म्हणाले की,, हे मंदिर युरोपातील जगन्नाथ संस्कृतीचे प्रतीक आणि जगभरातील हजारो भाविक आणि पर्यटकांना आकर्षित करणारे तीर्थक्षेत्र असेल.

कोण आहेत विश्वनाथ पटनायक?
पटनायक हे फिनेस्ट ग्रुप ऑफ कंपनीजचे अध्यक्ष आणि संस्थापक आहेत. अक्षय ऊर्जा, इलेक्ट्रिक वाहने (EVs), हायड्रोजन लोकोमोटिव्ह इत्यादींमध्ये त्यांची गुंतवणूक आहे. बँकर-व्यापारी बनलेल्या पटनायक यांनी अर्थशास्त्रात एमबीए, एलएलबी आणि बीए केले असल्याचे सांगितले जाते.

२००९पासूनचा प्रवास
अनेक वर्षे बँकिंग क्षेत्रात काम केल्यानंतर पटनायक यांनी २००९ मध्ये उद्योजकतेमध्ये प्रवेश केला. पटनायक यांनी अलीकडेच ओडिशामध्ये ईव्ही-हायड्रोजन ट्रक आणि व्यावसायिक अवजड वाहन निर्मिती प्रकल्पात ५०० कोटी रुपयांची गुंतवणूक करण्याची योजना जाहीर केली आहे. पटनायक यांची गुंतवणूक आरोग्यसेवा, फिनटेक, अक्षय ऊर्जा ते दुबईतील सोन्याच्या रिफायनरी आणि सराफा व्यापारापर्यंत विविध पोर्टफोलिओमध्ये पसरलेली आहे.

https://twitter.com/JagannathaUK/status/1650976583526629381?s=20

Industrialist biswanath patnaik Donate 250 Crore for Jagannath Temple uk